Москваҕа сэрии кэмин оҕолоро байыастары кытта көрүстүлэр

Москва аттыгар баар «Бэс Чагда» санаторийга бэрт  сэргэх көрсүһүү буолла. Саха сириттэн  эмтэнэ тиийбит сэрии сылларын оҕолоро санаторийга эмтэнэ сылдьар анал байыаннай дьайыы байыастарын кытта көрүстүлэр.

Көрсүһүүнү санаторий салалтата (генеральнай дириэктэр Георгий Дмитриевич Трофимов) тэрийдэ. Сэрии сылларын оҕолорун Дьокуускай куораттааҕы түмсүүтүн туһунан бырабылыанньа чилиэнэ Мария Николаевна Габышева кэпсээтэ.

Саха сиригэр 12 тыһыынчаттан тахса, Дьокуускай куоракка 4,5 тыһыынча сэрии сылларын оҕолоро олороллор, өрөспүүбүлүкэ уопсастыбаннай олоҕор күүстэрэ кыайарынан кытталлар.

— Аҕа дойду Улуу сэриитин  бүтэһик  көлүөнэ тыыннаах туоһулара, биһиги, 80 сааспытын ааспыт дьон — алдьатыылаах  сэрии буолуон, оҕолорбут, чугас дьоммут өлөн-сүтэн кэлиэхтэрин баҕарбаппыт. Кыайыыны түргэтэтэр инниттэн  туох кыалларынан — аптечка хомуйан, сиэккэ өрөн, чүмэчи кутан, сыттык, форма тигэн, көмөлөһө олоробут. Бар дьоҥҥут, дойдугут эһигини өйүүр, хорсун быьыыгытынан киэн туттабыт, эһиги дьиҥнээх  патриоттар буолаҕыт. Бүгүн бу көрсүһүүгэ Саха сирин нэһилиэнньэтин хоргуйууттан өрүһүйбүт быччыыка — собо миинин аҕаллыбыт, маны Хатас орто оскуолатын үөрэнээччилэрэ оҥорон, байыастар, булчуттар,  туристар биьирэбиллэрин ылбыт, собону хатаран оҥорбут мииннэрэ күүс-уох угуо, дойдугутун санатыа, — диэн Мария Николаевна эттэ.