«Моя профессия – ИТ» куонкурус эрэгийиэннээҕи түһүмэҕин кыайыылаахтарын быһаардылар

Ол курдук бириистээх миэстэлэргэ Мэҥэ Хаҥалас, Таатта, Покровскай, Мииринэй, Бүлүү оройуоннарын уонна үөрэх кыһаларын хамаандалара тигистилэр. Үс күн устата  67 хамаандаттан 216 кыттааччы маннык хайысхаларынан үлэлээтилэр: сайт оҥоруута, оонньуу бырайыактарын оҥоруу, уо.д.а. Хас биирдии хамаанда хайысхалартан талан, бырайыагы олоххо киллэрии уустук үлэтин толордулар уонна дьүүллүүр сүбэ иннигэр көмүскээтилэр.

СӨ Бырабыыталыстыбатын Бэрэссэдээтэлин солбуйааччы Анатолий Семенов бэлиэтииринэн, куонкурус сүрүн соруга — ыраах улууска олорор үөрэнээччи  бэйэтин ИT эйгэтигэр боруобаланыыта буолар.

«Идэҕэ туһаайар куонкурус буолар. Манна кыттан оҕолор бэйэлэрин билиилэрин-көрүүлэрин тургутан көрөр кыахтаналлар», — диэн  Анатолий Семенов бэлиэтиир.

 Куонкурус  2016  сылтан ыытыллар уонна идэҕэ туһаайар улахан тэрээһин быһыытынан биллэр. Маныаха быйылгы күрэс муниципальнай түһүмэхтэрэ үрдүк таһымнаахтык ыытыллыбыттара бэлиэтэнэр.