«Моя профессия — ИТ» кыайыылаахтара билиннилэр

Бырабыыталыстыба бэрэссэдээтэлин солбуйааччы Анатолий Семенов «Моя профессия – ИТ» Бүтүн Арассыыйатааҕы куонкурус эрэгийиэннээҕи түһүмэҕэр кыайбыт 4 хамаандаҕа бириистэри туттарда. 12 үөрэнээччи үрдүк үөрэх кыһатыгар тус сыаллаах үөрэххэ киирэргэ путевкалары тутта.

— 12 бастыҥ үөрэнээччи талбыт үөрэх кыһатыгар киирэр кыахтаммытыттан олус үөрэбин. Бэрэсидьиэн Владимир Путин уонна бырабыыталыстыба көмөтүнэн, биһиги куонкуруспут Бүтүн Арассыыйа үрдүнэн ыытыллар буолла. «Моя профессия – ИТ» — Арассыыйа үөрэҕин министиэристибэтин олимпиадаларын уонна куонкурустарын испииһэгэр киирэр, онон бары кыттааччылар БКЭ-ҕэ эбии бааллары ылаллар, — диэн кини эттэ.

Анатолий Семенов Бүтүн Арассыыйатааҕы түмүктүүр түһүмэххэ ситиһиилээхтик кытталларыгар баҕарда.

Өрөспүүбүлүкэтээҕи түмүктүүр түһүмэххэ 67 хамаандаҕа 216 үөрэнээччи, устудьуон кытынна. Уопсай бириис пуондата 1 мөлүйүөн солкуобайга тэҥнэстэ, ону 30 хамаандаҕа, 6 номинаҥҥа үллэрдилэр.

Быйыл эрэгийиэн түһүмэхтэрэ  15 тыһыынчаттан тахса үөрэнээччини хабан, 12 эрэгийиэҥҥэ ыытылыннылар. Түмүккэ 150 кыттааччы таҕыста. Муус устар 7-9 күннэригэр Калиниградка кыайыы иһин киирсиэхтэрэ.

Ил Дархан, бырабыыталыстыба пресс-сулууспата.