Моякуновтар саҥа дьиэлэригэр көстүлэр

Байыаннай дьайыы кыттыылааҕа  Павел Моякунов дьиэ кэргэнинээн саҥа дьиэлэригэр көстүлэр. Бу туһунан Ил Дархан Айсен Николаев телеграмҥа ханаалыгар иһитиннэрдэ.

— Павел Аҕа дойдутун туһугар дьоруойдуу охсуһа сылдьар. Кини  «За отвагу» мэтээлинэн наҕараадаламмыта.

Биир сыл анараа өттүгэр Моякуновтар дьиэлэрэ умайбыта.  Павел кэргэнэ уонна икки оҕото дьолго эчэйбэтэхтэрэ. Ол гынан баран туох баар баайдара-дуоллара уокка былдьаммыта. Онон биһиги туора турбакка, “Биир ньыгыл Арассыыйа” баартыйа, волонтердар уонна дьон-сэргэ  көмөтүнэн Моякуновтарга саҥа икки этээстээх дьиэни туттубут. Бүгүн Моякуновтарга ыалдьыттаатым. Билигин Павел уоппускатыгар кэлэ сылдьар. Кини олус махтанна, маннык күүс-көмө оҥоһуллубутунан.  Павел «Биир ньыгыл Арассыыйа» баартыйаҕа,  генеральнай сэкирэтээр Андрей Анатольевич Турчакка махталын тириэртэ, — диэн Айсен Николаев суруйда.

Санатар буоллахха, «Биир ньыгыл Арассыыйа» баартыйа Генеральнай сэбиэтин сэкирэтээрэ Андрей Турчак уонна Саха Өрөспүүбүлүкэтин баһылыга Айсен Николаев балаҕан ыйын 5 күнүгэр Дьокуускайга  дьиэтэ уокка былдьаммыт байыаннай дьайыы кыттыылааҕа Павел Моякунов саҥа дьиэтин тутуутун үлэтин көрбүттэрэ. «Биир ньыгыл Арассыыйа»  баартыйа көҕүлээн, үп-харчы, таҥас-сап хомуйбута.