Мугудайдар госпиталларга сироп оҥорон ыыттылар

Саха сирин олохтоохторо тыылга кыайыыны уһансаллар. Байыаннай дьайыы саҕаланыаҕыттан кинилэр ас астаан, эмп-томп хомуйан, таҥас тигэн улахан көмөнү оҥороллор.

Чурапчы улууһун Мугудай нэһилиэгин олохтоохторо байыаннай дьайыыга тиһигин быспакка көмөлөһөллөр. Соторутааҕыта эт, бурдук ас ыыппыттара, оттон бу күннэргэ отон хомуйдулар. Нэһилиэк олохтооҕо, волонтер Ульяна Слепцова ыҥырыытынан мугудайдар ыаллартан отон хомуйан «Чурапчы» ТХПК-ҕа туттардылар. Бу аахсыйаҕа оскуола оҕолоро бэйэлэрин баҕаларынан кыттыбыттарын волонтер Светлана Диодорова-Лаврентьева бэлиэтиир.

«Өрүү көмө буолар волонтербут Ульяна Слепцова ыҥырыытынан нэһилиэкпит олохтоохторо отон хомуйдулар. Бу аахсыйаҕа оскуола оҕолоро кыттыбыттара хайҕаллаах. Отонунан «Чурапчы» ТХПК сироп оҥорон таһаарбытын волонтер-суоппар Антон Варламов куоракка киллэрэн биэрдэ. Биһиги салгыы бу сироптары бааһыран госпиталга сытар уолаттарга илдьиэхпит», — диэн кэпсиир Светлана Диодорова-Лаврентьева.