Мукучу нэһилиэгэр суоллары оҥороллор

Олохтоох көҕүлээһини өйүүр бырагыраама чэрчитинэн (ППМИ) Кэбээйи улууһун Мукучу нэһилиэгэр суоллары оҥоруу салҕанар. Бу үлэни “ВИД-2000” ХЭУо ыытар. Бу күннэргэ кинилэр Сэбиэскэй уулуссаҕа кумах кута сылдьаллар. 

— Бу үлэ былырыыҥҥыттан саҕаламмыта, — диир “Дайан” сынньалаҥ киинин уус-уран салайааччыта Вера Прокопьева. – Былырыын киин уулуссабытыгар Октябрьскайга буор куппуттара, быйыл онно уонна биһиги “Саһарҕа” түөлбэбитигэр,  Сэбиэскэй уулуссаҕа кумах кута сылдьаллар. Кумаҕы кутан баран тэҥнээн, чиҥэтэн биэриэхтээхтэр. Эһиил турбалары угуохтаахтар, ону кытта быстах туора уулуссаларга кутуохтара. Суолу кытта тротуары эмиэ оҥороллоро буоллар диэн баҕа санаалаахпыт.