Мукучуга үҥкүү алыптаах киэһэтэ

Одун Хаан ыйыгар Кэбээйи улууһун Мукучу нэһилиэгэр бэрт сэргэх тэрээһиннэр тиһигин быспакка салҕаналлар.

Ол курдук олунньу 7 күнүгэр «Дайан» сынньалаҥ киинигэр Аграфена Дмитриевна Макарова аатынан Дьокуускайдааҕы Култуура, искусство кэллиэһин үҥкүү салаатын үһүс кууруһун устудьуона Аэлита Павлова быраактыкатын түмүктүүр үлэтин көрдөрөр киэһэтэ буолан ааста. Биллэн турар,  тэрээһиннэрбит бука барыта Кыайыы 80 сылыгар, дойдуга бэриниилээх буолууга ананаллар. Күндү көрөөччүлэрбит сааланы толору мустан, үҥкүү алыбар ылларан, хас биирдии сыанаҕа тахсар кыттааччыны эрчимнээх ытыстарын тыаһынан доҕуһуоллуу көрүстүлэр. Биллэн турар, итинник өйөбүл күүһүнэн бииртэн биир сонун туруоруу үҥкүү буолан ытыллан истэ.

Дьэ, чахчы да талан үөрэнэ сылдьар идэни ис сүрэхтэн таптаан, үлэ түмүгүн бар дьон дьүүлүгэр таһаарыы элбэх сыраттан кэлэрин, бүгүҥҥү киэһэни бэлэхтээбит кыттааччылар уонна уһуйааччы Аэлита Николаевна итэҕэттилэр. Дьоро киэһэҕэ кыттыбыт Оҕо искусствотын оскуолатын үөрэнээччилэрин, «Эрчим» үҥкүү бөлөҕүн, «Сайдыына», «Уруйдаана» түмсүүлэр, «Дэриэбинэчээн» норуот тыйаатырын артыыстарын, сынньалаҥ киин үлэһиттэрин күүстэринэн туруоруллубут үҥкүүлэр ураты тыыннаахтарын көрөөччүлэр сэргии, кэрэхсии көрдүлэр. Сырдыгынан сыдьаайар аптаах сыанабыт бу киэһэ хас биирдии киһи сүрэҕин кылын таарыйбыт, кэрэҕэ угуйбут буолуохтаах.

Түмүккэ Аэлитабытыгар махтал тыллар, эҕэрдэлэр этилиннилэр. Талан ылбыт идэтин баһылыырыгар, ыччат дьоҥҥо холобур буоларыгар, үҥкүү алыптаах аартыгар саҥа саҕахтары арыйарыгар баҕара хааллыбыт.

Күндү көрөөччүлэрбитин үҥкүү абылыыр күүһүн эккитигэр-хааҥҥытыгар иҥэрэн туруккутун тупсарыҥ, хас үүнэр күнү ырыанан айхаллааҥ, үҥкүүнэн уруйдааҥ диэн алгыы хаалабыт.

Вера Прокопьева.