Мукучулар испэктээктэрэ астыннарда

Билигин улуустарга Олоҥхо ыһыаҕа ыытылларынан түөлбэ олоҥхоһуттарын үйэтитии ирдэбилэ турда. Ол иннинэ, итинник олоҥхону туруоруу баар этэ дуо диэн ыйытыыга Мукучу оскуолатын бибилэтиэкэрэ К.Е. Новикова сэминээргэ  1947 сыллаахха учууталлар туруора сылдьыбыттарын туһунан иһитиннэрбитэ.

1950-60 сылларга П.А.Ойуунускай «Ньургун Боотур» олоҥхотун туруорбуттара. 1987 сыллаахха Л.В.Кириллина Мукучу кулуубугар директорынан үлэлии сылдьан олоҥхо персонажтарын  уруһуйдаппытыттан, сорох хартыыналара Арчы дьиэтигэр баар.

«Дэриэбинэчээн» норуодунай тыйаатыр артыыстара Кырса Сөдүөт олоҥхотун 2024 сыллаахха ыһыахха толорбуттара. «Төрүт үгэс, сөргүтүү, үйэтитии» улуустааҕы тэрээһин чэрчитинэн Федот Семенович Семенов — Кырса Сөдүөт «Биэ Уола Бэйбэлдьийэ Тулаайах» олоҥхотун «Дэриэбинэчээн» норуот тыйаатырын тэттик туруоруутун сэминээри түмүктүүр киэһэҕэ толордулар. Норуодунай тыйаатыр  артыыстара оруолларын бары толору арыйдылар.

Ол курдук Сэһэнньит оруолун — Сардаана Жакипова, Аан Айыыһыт Наарай Хотуну — Татьяна Гоголева, Үрүҥ Самалдьыйаны — Сахая Белолюбская, Биэ Уола Бэйбэлдьийэ Тулаайаҕы — Семен Федоров, Биэ Уола Бэйбэлдьийэ Тулаайах оҕо эрдэҕинээҕитин — Сеня Унаров, Ытык Сиэкилэни — Вера Прокопьева, Абааһы кыыһын — Каролина Кудрина,
Муоһуйа Бухатыыры — Вячеслав Борисов, Тимир Эриэй Бухатыыры — Николай Андросов  кыайа-хото туттулар.

Испэктээх туруорааччы-режиссердара  — Саргылаана Иванова, Ирина Находкина, тыаһы-ууһу, уоту-күөһү таҥна — Еремей Сидоров, сыананы оҥордо — Данил Иванов.
Онон,

Мукучу талааннаахтарын утума салҕанар.

Марта Николаева