Муммут дьахтары буллулар

Бүгүн, атырдьах ыйын 26 күнүгэр, 112 нүөмэргэ эрийэн, Маҕанныыр суол аттыгар дьахтар сүппүтүн туһунан иһитиннэрбиттэр. Бу туһунан СӨ Быыһыыр сулууспатын пресс-сулууспата иһитиннэрэр.

Дьахтар тыаҕа отоннуу барбыт уонна төннүбэтэх.

Быһылаан буолбут сиригэр Быыһыыр сулууспа дьуһуурунай симиэнэтэ туруммут. Дьахтар төлөпүөнүн сибээһэ хабар буолан, быыһааччылар ханан баарын быһаарбыттар.

«Геолокациятын ыламмыт, түргэнник буллубут. Кини олоҕор куттал суоһаабат», — диэн, аэромобильнай көрдүүр-быыһыыр салаа быыһааччыта Владислав Сивцев этэр.