Муммут эр киһи Сунтаартан Өлүөхүмэҕэ тиийбит

От ыйын 15 күнүгэр Өлүөхүмэ улууһугар муммут эр киһини буллулар. Кини 9 күн устата мунан, Сунтаартан Өлүөхүмэҕэ тиийбит. Бу туһунан СӨ Быыһыыр сулууспатын пресс-сулууспата иһитиннэрэр.

56 саастаах эр киһи быстарбыт, туруга мөлтөх соҕус. Бэйэтэ этэринэн, тоҕус күнү быһа аһаабакка сылдьыбыт. Кинини оройуоннааҕы балыыһаҕа киллэрбиттэр.

Килиэр диэн аҕыйах киһилээх учаастак таһыгар, ойуур баһаарын умуруорааччылар бу эр киһини алҕас түбэһэн булбуттар. Дьэ, хата араҥаччылыыр аанньаллардаах, бүтэй оҥоһуулаах киһи эбит. Араас кыыл-сүөл элбэх кэмигэр, суола-ииһэ суох тайҕа устун сүүрбэттэн тахса көһү барыахха диэтэххэ, манан аҕай дьыала буолбатах.

Урут да ырааҕы хаамар киһи эбит, ол эрээри, бу күннэргэ кини сүппүтүн туһунан иһитиннэрии тоҕо эрэ киирбэтэх.