Мунду – төрүт аспыт

Мин субу кыыл сибикилии сылдьаммын, биир 86 саастаах нуучча оҕонньоро илдьит ыыппытын истэммин, үүтээнигэр тиийдим. Уруккута арҕахха соҕотоҕун киирэр хоодуот  киһи. Биир тарбахха баттанар эсэһит.

Бултуур дьиэтин эһэ ыспыт эбит. Аһын-үөлүн, хаһаа­һын букатын тугу даҕаны ордорботох. Сайын кэлэн үүтээнин тиэргэнин оттоон, бугуллаабытын дьиэ­ҕэ киллэрэн оронун анныгар симпит. Оҕонньор ону абаланар. Мин: “Бу, кырытыннараары киэптээбит”, – диибин. Арааһа, ити, орон анныгар оту хаалаан, онно сытан кыстыырдыы бэлэмнэнэн көрбүт. Онтон, чугас чуҥнаан сылдьан баран, дьон кэлэрин-барарын көрөн, дьаарханан дьаадьыйбыт бадахтаах.

Оҕонньор үс ыттаах. Ыттара бары кыылга үчүгэйдэр.

Кырдьаҕастан уһун үйэлэнии кистэлэҥин ыйыталастым.

«Сибиэһэй, бэйэ аһылыга саамай туһалаах», – диир.

Ордук, мундуну хайгыыр. Олус туһалаах ас, сылайбат сындааһыны биэрэр, эстибэт сэниэни киллэрэр диир.

Чооҕура бэрт, ол эрэн, мунду булда. Ылбычча, мэнээк бултаныллыбат.

Дьэ, манныкка, өбүгэлэрбит ньымалара баар. Сүрүннээн Бүлүү, Кэбээйи диэкилэр киэннэрэ.

Күһүн, буһук саҕана, мунду үөрдээн кытыылыыр. Ону тыынан талбаардан сылдьан куйуурунан баһаллар. Ким хапсаҕай, ол хаста баһарынан куоталаһан. Оннугу Ээйик эбэҕэ Балыксыт диэн түөлбэтигэр көрбүтүм. Хас эмэ куулунан ылаллар этэ. Кэлин муҥханан хаама сылдьан кутаттан күрэтэн баһар этибит, туоннанан. Саамай кэнникибин Ыгыаттаҕа Иһэрдээх күөлүгэр баһалларын көрбүтүм, хас эмэ буочуканан. Биир куулу саҥа ыраас мууска халытан тоҥорон ылбытым, сиэн күннээбитим. Саас куул чиэппэрин күөгүһүттэргэ мэҥиэҕэ биэрбитим.

Егор Сыромятников.