Муҥха Дэлбэрийбит ыалдьыттара

Тааттаҕа ыытылла турар “Манчаары оонньууларын” көрө таарыйа, Былатыан Ойуунускай күн сирин көрбүт Муҥха Дэлбэрийбит алааһыгар элбэх ыалдьыт сырытта.

От ыйын 9 күнүгэр сарсыардаттан “Дьулуруйар Ньургун Боотур уонна Боотурдар көлүөнэлэрэ” диэн кинигэ биһирэмэ буолла. Ону Александр Ким-Кимэн иилээн-саҕалаан ыытта. Манна успуорт бэтэрээннэрэ, успуорка үлэлии сылдьар дьоммут-сэргэбит, олимпийскай чөмпүйүөн Павел Пинигин уо.д.а. кыттыыны ыллылар. Биир үөрүүлээх түгэнинэн “Сахабулт” АУо Былатыан Ойуунускй этэрбэһин тигэн, түмэлбит пуондатыгар бэлэхтээн, үөрүүбүт муҥура суох. “Сахабултарга” улаханнык махтанабыт. Биллэр ырыаһыт Кэскил Баишев ис санаатыттан бэйэтэ уруһуйдаабыт хартыынатын бэлэхтээн үөртэ, киниэхэ эмиэ махталбытын биллэрэбит.

Александр Ким-Кимэн, РФ үтүөлээх юриһа:

“Дьулуруйар Ньургун Боотур уонна Боотурдар көлүөнэлэрэ” диэн силбэһиини оҥордубут. Ол аата араас көлүөнэлэр биһиги улуу убайдарбытын мэлдьи үрдүк таһымҥа тутан, кинилэр ааттарыгар сүгүрүйэн, кинилэр эппит тылларын истэн, биһиэхэ биэрбит сорудахтарын толоро сылдьыахтаахпыт. Бүгүҥҥү төгүрүк остуолбут олус тахсыылаахтык барбытыттан, кинигэ билиһиннэриитэ үчүгэйдик барбытынан астынным”.

Бу күн успуорт уонна физическэй култуура миниистирэ Леонид Спиридонов Москваттан сылдьар успуорт салайааччыларын: РФ успуорка министиэристибэтин физкултуураҕа, маассабай успуорка департаменын дириэктэрэ Максим Уразовы, РФ национальнай уонна олимпийскай буолбатах көрүҥнэригэр кэмитиэт бэрэсидьиэнэ Борис Гришины, эмиэ бу кэмитиэт вице-бэрэсидьиэннэрэ Игорь Павлюгу, Михаил Ершовы илдьэ кэлэн ыалдьыттаатылар. Манна “Былатыан Ойуунускайтан саҕалаан успуорт инники кирбиитигэр” диэн быыстапка аһылынна. Быыстапка аһыллыытыгар Успуорт министиэристибэтэ планшеттары таһаараарга көмөлөспүтэ. Кэлбит ыалдьыттарга быыстапка туһунан түмэлбит сэбиэдиссэйэ Михаил Аржаков билиһиннэрдэ. Былатыан Ойуунускай ЯЦИК бэрэссэдээтэлинэн олорон, ”Саха омук” иһинэн уопсастыба тэрийэн, физкултуураны норуокка тарҕатыахха диэн Уураах таһаарбытын туһунан сиһилии кэпсээтэ.

Леонид Спиридонов, успуорт уонна физическэй култуура миниистирэ:

“Былатыан Ойуунускай Николай Гущин диэн физкультура хамсааһынын иилиир-саҕалыыр киһини кытта бииргэ үлэлииллэр. Ол нөҥүө саха норуотун успуорка хайдах угуйабыт диэн толкуйдаан баран, национальнай көрүҥнэринэн угуйуохха сөп диэн быһаарыы ылыныллар уонна улахан үлэни ыыталлар. 1924 сыллаахха национальнай көрүҥнэргэ оонньуулары ыытахха диэн уураах таһаарар. Ол оонньуулар чэрчилэринэн бэлэмнэнии бөҕөтө буолар. Оччолорго Былатыан Ойуунускай спартакиаданы ыытабыт диэн уураах таһааран, биһиги национальнай көрүҥнэрбит сайдалларыгар улахан өҥөлөөх киһибит буолар.

Мин бу алааска хаста да кэлэ сылдьыбытым. Алаас олус сырдык үчүгэй салгыннаах, саха дьоно манна күүс-уох ыла куруук сылдьыахтарын наада. Биһиги министиэристибэбит Былатыан Ойуунускай успуорт өттүнэн норуокка киллэрбитт өҥөтүн истиэндэ оҥорон бу түмэлгэ бэлэхтээтэ”.

Василий Егоров, боксер:

“Мин Тааттаҕа иккис сырыым. Бастаан саха литературата төрүттэммитэ 123 сылыгар кэлэ сылодьыбытым, оттон бу убайбыт Ойуунускай алааһыгар аан бастакы сырыым. Хайдах эрэ сылаанньыйан чэпчээн хааллым, хараҕым арыллыбыт курдук буолла. Бүгүҥҥү тэрээһиҥҥэ кыттыыны ылбыппыттан үөрэн-долгуйан, астынан турабын”.

Бу күммүтүн түмүктээн, Ойуунускай сиэн балта, Ойуунускай аатынан судаарыстыбаннай бириэмийэ лауреата, саха норуодунай суруйааччыта Елена Слепцова-Куорсуннаах олохтоохтору, Таатта ыалдьыттарын кытта Былатыан төрөөбүт балаҕаныгар көрсүһүү оҥордо. Дьон-сэргэ трассаттан туораан, сорохтор сатыы хааман кэлэн, Куорсуннаах кэпсээнин, экскурсиятын иһиттилэр. Ньурба, Нам, Үөһээ Бүлүү, чугастааҕы улуустартан, бэйэбит нэһилиэктэрбититтэн кытта кэлэн истэн, наһаа үөрэн-долгуйан бардылар. Көрсүһүүгэ Горнай улууһун Орто Сурт нэһилиэгин олохтооҕо, Чөркөөх түмэллэрин доҕордоро, 80-тан тахса саастаах Бүөтүр кырдьаҕас ыалдьыттаан, Былатыан Ойуунускай балаҕаныгар Куорсуннаах кэпсээнин истэр биир баҕа санаам туолла диэн олус үөрэн барда.

Светлана Халгаева.