Муниципальнай сулууспа бэтэрээннэрэ баһылыктары талыы бэрээдэгин өйөөтүлэр

Ил Дархан Айсен Николаев алтынньы 20 күнүгэр өр сылларга өрөспүүбүлүкэ оройуоннарын салайбыт муниципальнай сулууспа бэтэрээннэрин кытары көрүстэ.

Ил Дархан өрөспүүбүлүкэ олохтоох бэйэни салайыныы икки таһымнааах систиэмэтин суолунан, ол эбэтэр география, устуоруйа уонна социальнай-экэнэмиичэскэй чахчыларга олоҕурбут баар структуранан, барарын өссө төгүл санатта.
«Биһиги билигин муниципальнай таһымҥа быыбардыыр хампаанньа хайдах уустугурбутун өйдүүбүт. Бу кыһалҕаны ордук нэһилиэктэр, куораттар таһымнарыгар көрөбүт. Дойду билиҥҥи балаһыанньатыгар олохтоох уопсастыбалар ортолоругар үөскүүр тыҥааһын  биир ньыгыл түмсүүлээх буоларбытыгар мэһэйдиир. Биһиги сирбит-уоппут уратытын уонна салайыы үгэстэрин учуоттуур икки таһымнаах моделы тутуһабыт. Нэһилиэнньэ эмиэ бу хайысхаҕа уларыйыылары билиэн баҕарар. Өрөспүүбүлүкэ Төрүт сокуонугар олохтоох бэйэни салайыныыга уларытыылар боппуруостарыгар эһигини кытары сүбэлэһиэхпин баҕарабын», – диэтэ Айсен Николаев.
Өрөспүүбүлүкэ баһылыга 33 федеральнай сокуон ирдэбилин учуоттаан, муниципальнай тэриллиилэр баһылыктарын талыы систиэмэтин уларытарга этиилэр киирэллэрин иһитиннэрдэ. Ол курдук, куорат уокуруктарын уонна муниципальнай оройуоннар баһылыктарын улуустааҕы сэбиэт уонна куорат уокуругун бэрэстэбиитэллээх уоргана талыахтара. Баһылыктары куонкурус хамыыһыйата киллэрбит хандьыдааттарыттан бэрэстэбиитэллээх уорган талыаҕа.

«Маннык ньыма былаас бары уорганнарын хардарыта бииргэ үлэлээһиннэрин бөҕөргөтөр», – диэтэ Айсен Николаев.
Судаарыстыбаннай муниципальнай сулууспа бэтэрээннэрэ өрөспүүбүлүкэ Төрүт сокуонугар уларытыылары киллэриини уонна муниципалитеттар баһылыктарын талыы бэрээдэгин саҥардыыны өйөөтүлэр.
«Төрүт сокуоҥҥа уларытыылары киллэрии Саха сирин олохтоохторун бырааптарын быспат. Сокуоннар уонна бырааптар бары тутуһуллаллар. Мин Айсен Николаев көҕүлээһинин өйүүбүн», – диэн Саха Өрөспүүбүлүкэтин Төрүт сокуонун ылыныыга үлэлэспит, уопсастыбаннай-бэлитиичэскэй уонна судаарыстыбаннай диэйэтэл Климент Иванов бэйэтин этиитигэр бэлиэтээтэ.
2002-2007 сылларга Чурапчы улууһун баһылыга Иннокентий Аммосов быыбар билиҥҥи систиэмэтигэр каадырдар утумнаһыылара сүппүтүн, салайааччылары уларытарга саҥа хамаанда кэлэрин, үгүс түгэҥҥэ уопуттаах исписэлиистэр баралларын, онтон кинилэр оннуларыгар билиитэ-көрүүтэ суох дьон кэлэрэ муниципалитет сайдыытыгар дьайарын туһунан санаатын этэн, быыбардааһын бу систиэмэтин өйүүрүн уонна баһылыктарга улахан эппиэтинэс сүктэриллэрин тоһоҕолоон  бэлиэтээтэ.
1992-1997 сылларга Дьааҥы улууһугар баһылыктаабыт, өрөспүүбүлүкэ Уопсастыбаннай балаататын бэрэссэдээтэлэ Иван Горохов уонна 1995-2000 сылларга Амма улууһун салайбыт, тыа хаһаайыстыбатын миниистиринэн, бырабыыталыстыба бэрэссэдээтэлинэн үлэлээбит Дмитрий Наумов быыбардааһын бу бэрээдэгэ киллэрилиннэҕинэ улуустар уонна нэһилиэктэр баһылыктарын дуоһунаһыгар бэлэмнээх, уопуттаах исписэлиистэр кэлиэхтэрин туһунан эттилэр.

Айсен Николаев Төрүт сокуон балаһыанньалара 414 федеральнай сокуоҥҥа сөп түбэһиннэриллэрин быһыытынан, Арассыыйа субъектара бары бэйэлэрин нуорма-быраап аакталарын онно сөп түбэһиннэрэр эбээһинэстээхтэрин санатта. Чуолаан, ол иһин өрөспүүбүлүкэ Төрүт сокуонугар уларытыылары киллэрии наадата үөскээтэ.

СӨ Ил Дарханын уонна бырабыыталыстыбатын пресс-сулууспата