Муниципальнай сулууспаҕа сүрүн ирдэбиллэргэ уларытыылар киирдилэр

Ил Түмэн уон бэһис (уочараттаах) пленарнай мунньаҕар норуот дьокутааттара «Саха Өрөспүүбүлүкэтигэр муниципальнай сулууспа туһунан» сокуонугар уонна «Муниципальнай сулууспалаахтарга кылаас чыыннарын иҥэрии бэрээдэгин туһунан»  сокуонугар уларытыылары киллэрии туһунан 300-7 №-дээх СӨ сокуонун бырайыагын иккис уонна бүтэһик ааҕыыга көрөн ылыннылар. Бу туһунан Ил Түмэн пресс-сулууспата суруйар.

Сокуон бырайыагынан «Саха Өрөспүүбүлүкэтигэр муниципальнай сулууспа туһунан» сокуонун 6-с ыстатыйатынан олохтоммут муниципальнай сулууспа дуоһунастарын солбуйууга сүрүн ирдэбиллэригэр уларытыылары киллэрэрэ этиллэр. Уларытыылар байыаннай дьайыы кыттыылаахтарын муниципальнай сулууспаҕа киллэриини хааччыйар, ону тэҥэ муниципальнай сулууспа каадырын састаабын тэрийии боппуруоһун быһаарар сыалтан муниципальнай сулууспа дуоһунастарын солбуйууга  үөрэҕин таһымыгар, муниципальнай сулууспа ыстааһыгар эбэтэр идэтинэн, бэлэмин хайысхатынан үлэ ыстааһыгар ирдэбиллэри намтатыыга туһуланаллар. Ол курдук, муниципальнай сулууспа ыстааһыгар эбэтэр идэтинэн үлэ ыстааһыгар ирдэбиллэри намтатар туһунан этиллэр:

• Дуоһунастар үрдүкү бөлөхтөрүгэр – биэс сылтан үс сылга диэри;
• Сүрүн бөлөххө – биэс сылтан икки сылга диэри;
• Бастыҥ бөлөххө – ыстааска ирдэбили уһуларга (урут түөрт сылтан итэҕэһэ суох этэ).

Дуоһунастар сүрүн бөлөхтөрүгэр үөрэх таһымыгар ирдэбиллэр намтаатылар: үрдүк үөрэхтээх буолуу олохтонно, магистратураттан, специалитеттан намыһаҕа суох үөрэх ирдэммэт буолла. Итини таһынан, муниципальнай сулууспаны үрдэтэр, ол иһигэр байыаннай дьайыы кыттыылаахтарын тардар табыгастаах усулуобуйаны тэрийэр сыалтан, муниципальнай сулууспа кылаас чыыннарын иҥэриигэ байыаннай уонна анал сыбаанньалары, атын судаарыстыбаннай сулууспа кылаас чыыннарын учуоттуур, ону тэҥэ, судаарыстыбаннай гражданскай сулууспаҕа кылаас чыыннарын иҥэриигэ эксээмэн түмүгүнэн кылаас чыыннарын иҥэриини тохтоторго этилиннэ.