Муниципальнай тэриллиилэр бэрэстэбиитэллээх уорганнарын дьокутааттарын III сийиэһэ саҕаланна

Бүгүҥҥүттэн Дьокуускай куоракка Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын III сийиэһэ саҕаланна. Сийиэс икки күн тигинэччи үлэлиэ.

Бүгүн Ил Түмэҥҥэ «төгүрүк остуолга» «Саха Өрөспүүбүлүкэтигэр олохтоох салайыныы туһунан» Саха Өрөспүүбүлүкэтин сокуонун барыла ырытылынна.
Мунньаҕы сийиэс аһыллыбытынан эҕэрдэлээн туран, «төгүрүк остуол» хаамыытын бэрээдэгин билиһиннэрииттэн Ил Түмэн олохтоох бэйэни салайыныы сис кэмитиэтин бэрэссэдээтэлэ Владимир Прокопьев аста. Ол кэннэ Ил Түмэн судаарыстыбаннай тутуу уонна сокуону оҥоруу сис кэмитиэтин бэрэссэдээтэлэ Афанасий Владимиров сийиэс кыттыылаахтарын эҕэрдэлээтэ. Кини бу Муниципальнай тэриллиилэр бэрэстэбиитэллээх уорганнарын дьокутааттарын III үбүлүөйдээх сийиэһэ буоларын тоһоҕолоон бэлиэтээтэ.
Салгыы «Олохтоох бэйэни салайыныыга федеральнай уонна өрөспүүбүлүкэтээҕи сокуоннарга уларытыылары киллэрии туһунан» тиэмэҕэ икки сүрүн дакылаат оҥоһулунна.
СӨ Баһылыгын уонна Бырабыыталыстыбатын дьаһалтатын Олохтоох бэйэни салайыныыга боппуруостарыгар департаменын салайааччыта Иван Попов биир кэлим аһаҕас былаас систиэмэтигэр олохтоох бэйэни салайыныыны тэрийии уопсай бириинсиптэрин туһунан быһааран кэпсээтэ. Дьокутааттары саҥа уларыйыылар олоххо киирэллэригэр күүскэ үлэлииргэ ыҥырда.
Оттон СӨ Баһылыгын иһинэн үлэлиир хоруупсуйаны уонна атын даҕаны быраабы кэһиини сэрэтэр управление салайааччытын солбуйааччы Надежда Сейдалова муниципальнай тэриллиилэр бэрэстэбиитэллээх уорганнарыгар хоруупсуйаны утарар сокуон сүрүн ирдэбиллэрин туһунан кэпсээтэ. Хоруупсуйаны утары нуормалар, дьокутааттар оруолларын, дьокутааттар судаарыстыбаннай дуоһунастаах дьон буолалларын өйдүүллэрин  бэлиэтээтэ.
Муниципальнай тэриллиилэр бэрэстэбиитэллээх уорганнарын дьокутааттара бу «төгүрүк остуолга» киирбит быһаарыылары ылыныы сокуоҥҥа киириэхтэрэ дуо, нэһилиэктэр дьокутааттарын сэбиэтин бэрэссэдээтэлэ босхолонор дуоһунас буолуо дуу, бастайааннай буолуо дуу, боломуочуйалар хайдах тыырыллыахтарай, муниципальнай сулууспалаахтар хамнастара үрдүө дуо, о.д.а. ыйытыылар турдулар.

Владимир Прокопьев саҥа сокуоҥҥа олус элбэх этии киирдэ, бу тэрээһиннэргэ киирбит этиилэри бүгүн, сарсын киллэрэр кыах баарын эттэ. Салгыы атын боппуруостарга сокуону оҥорооччулар олохтоох бэйэни салайыныы саҥа сокуонун ис тутулун сиһилии ырытан быһаардылар. Кэлэр сыл ортотугар диэри боломуочуйаны тыырыыга бириэмэ өссө баарын, улуус таһымынан, уратытынан, нэһилиэнньэ ахсаанынан быһаарыллыаҕын эттилэр. Оттон хамнас туһунан эттэххэ, 2026 сылга ыам ыйынааҕы үрдээһиҥҥэ хапсыбатахтарга, үрдүүрэ, оттон нэһилиэк сэбиэтин бэрэссэдээтэллэрэ олохтоох бэйэни салайыныы уорганнарын устаабыгар киирдэҕинэ, олохтоох бүддьүөттэн төлөнүөн сөбө этилиннэ.
Бу мунньах олохтоох салайыныы актуальнай тэрийэр уонна сокуону оҥорор боппуруостарын ырытыыга суолталаах былаһаакканан буолла.
Сүрүн түгэннэртэн биирдэстэринэн былаас бэрэстэбиитэллээх уорганнарын үлэтин көдьүүстээхтик үрдэтэр суоллары ырытыы буолла. Дьокутааттар федеральнай сокуоннары уонна өрөспүүбүлүкэтээҕи нуормалары тупсарыынан санааларын атастастылар. Дэлэгээттэр бэйэлэрин санааларын, этиилэрин көхтөөхтүк киллэрдилэр, олор Саха сирин олохтоох салайыныытын туһунан сокуон барылыгар учуоттаныахтара.
Киирбит санаалары уонна этиилэри учуоттаан, 2025 сыл бүтүөр диэри «Саха Өрөспүүбүлүкэтигэр олохтоох салайыныы туһунан» Саха Өрөспүүбүлүкэтин сокуонун ылынарга; 2026 сыл бастакы аҥаарыгар Саха Өрөспүүбүлүкэтин Ил Түмэнин иһинэн муниципальнай тэриллиилэр бэрэстэбиитэллээх уорганнарын Сэбиэтин мунньаҕын ыытарга, бу Федеральнай сокуон 32  ыстатыйатын 3 чааһыгар ыйыллыбыт боломуочуйалары, куорат уокуруктарын, муниципальнай оройуоннар, куорат уонна тыа олохтоох салайыныы уорганнарыгар ыытыллар гына, ырытарга уонна этиилэри оҥорорго быһаардылар.