Мунньуллубут биэнсийэни уорууга түөкүттэр саҥа албаһы булбуттар

Түөкүннэр биэнсийэҕэ мунньуллубут үбү-харчыны эбэтэр аҕам саастаахтар тус мунньуммут харчыларын «уһун болдьохххо мунньунан уурунуу бырагырааматыгар» эбэтэр «биэнсийэни судаарыстыба үбүнэн кыттыһан үбүлээһин бырагырааматыгар» көһөрөбүт диэн саҥа албаһы толкуйдаабыттар. Бу туһунан ТАСС ИДьМ информация-коммуникация технологияларын сокуону кэһэн туһаныыны утары охсуһууну тэрийэр управлениетыгар иһитиннэрдилэр.

«Аҕам саастаах дьоҥҥо төлөпүөнүнэн эбэтэр мессенджер нөҥүө биэнсийэлэрин мунньуммут эбэтэр тус харчыларын «уһун болдьохтоох мунньан уурунуу бырагырааматыгар» эбэтэр «биэнсийэни судаарыстыба үбүнэн кыттыһан үбүлээһин бырагырааматыгар» көһөрөргө этэллэр. Онуоха буруйу оҥорооччулар харчы тута икки төгүл улаатыа, түргэнник төлөнүө эбэтэр атын барыстаах усулуобуйалары эрэннэрэллэр», — диэн управлениеттан сэрэтэллэр.

ИДьМ сулууспатыттан бэлиэтээбиттэринэн, биэнсийэни судаарыстыба үбүнэн кыттыһан үбүлээһин бырагырааматыгар саҥа кыттааччылары аны ылбаттар, сайабылыанньаны тутуу 2014 сыл ахсынньы 31 күнүгэр түмүктэммитэ. Бу бырагыраамаҕа 2008 сыл алтынньы 1 күнүттэн 2014 сыл ахсынньы 31 күнүгэр диэри сайабылыанньа биэрбит уонна 2015 сыл тохсунньу 31 күнүгэр диэри бастакы усунуостарын киллэрбит дьон эрэ кыттыбыттара. Оттон уһун болдьохтоох мунньуунуу бырагыраамата дьиҥнээхтик баар, ол эрээри лицензиялаах судаарыстыбаннай буолбатах биэнсийэ пуондаларын (СББП/НПФ) нөҥүө эрэ үлэлиир.

«Дуогабары СББП официальнай саайтын эбэтэр офиһын нөҥүө эрэ түһэрсиэххэ сөп. Төлөпүөнүнэн, мессенджер нөҥүө эбэтэр атын туора саайтарга оҥотторорго этиилэр барыта — түөкүннээһин бэлиэтэ», — диэн киберполицияттан бэлиэтээтилэр.