«Муома» айылҕа пааркатыгар сэдэх үрүмэччи көстүбүт

Бу сайын «Муома» айылҕа пааркатынан тэриллибит эспэдииссийэтин кэмигэр, Мраморнай хайаҕа Gynaephora (rossii) көрүҥүн бөлөҕүттэн «волнянка» диэн быһаарыллыбыт үрүмэччи үөнэ хомуллубут. Бу туһунан «Заповедная Якутия» ТГ-ханаала иһитиннэрэр.

«Волнянкалар – бу түүҥҥү, эбэтэр араас бытыктаах хатырыктаах кынаттаахтар үрүмэччилэр биистэрэ. Кинилэр орто кээмэйдэринэн уонна түүлээх, модьу эттэринэн-сииннэринэн уратылаахтар. Атыырдарын бытыктара тараахтыы оҥоһуулаах, оттон сорох көрүҥнэр тыһылара кыната суохтар. Саха сирин фаунатыгар 6 көрүҥ баар. Билиҥҥи туругунан, Сибиир хоту өттүгэр Gynaephora (rossii) көрүҥүн бөлөҕүттэн икки көрүҥ волнянка тарҕаммыт: ол эбэтэр Gynaephora relictus (O. Bang-Haas, 1927) уонна Gynaephora rossii (Curtis, 1835)», – диэн РНА СС Криолитозона биологиятын проблемаларын институтун үлэһитэ, биология наукатын хандьыдаата Альбина Бурнашева уонна «Муома» АП старшай госинспектора Иннокентий Федоров иһитиннэрэллэр.

Gynaephora үрүмэччи тыһыларын кынаттара үчүгэйдик сайдыбыттар, ол эрээри кинилэр үксүн хамсаналлара мөлтөх, онон үрдүк хайалаах сирдэргэ эбэтэр Арктикаҕа тохтоло суох тыалга бу үөнү-көйүүрү, эбиитин сэдэх көрүҥүн, көрсөр олус уустук. Маннык түгэҥҥэ факультативнай партеногенез диэн мэхэньииһим үлэлиир. Ол аата, буоһаабатах тыһы үөн тыыннаах хаалар кыахтаах кэлэр көлүөнэни биэрэр.