Муома хайаларыттан икки дьахтар сууллубут

Муома улууһугар Победа хайаҕа Күрэтэр диэн муус булууска сылдьан, икки дьахтар хайаттан суулунна диэн СӨ Быыһыыр сулууспата иһитиннэрэр. 

Победа хайа — Саха сиригэр эрэ буолбакка, Арассыыйа хотугулуу-илин өттүгэр саамай үрдүк хайа буолар, Черскэй сис хайатын чыпчаала. Чыпчаалын муҥутуур үрдүгэ — 3003 миэтэрэ. Бу хайаны дабайыы дойдуга саамай уустук дабайыыларга киирсэр. Олус кэрэ, ураты айылҕалаах буолан, төһө да уустук суоллаах-иистээх буоллар, кэнники кэмҥэ турист быһыытынан барааччы ахсаана эбиллэн иһэр.

Муома улууһугар хайаттан сууллуу туһунан суһал иһитиннэрии от ыйын 22 күнүгэр күнүс 13 чаас 39 мүнүүтэҕэ киирбит.

Бу дьахталлар турист быһыытынан хайаларга барбыттар. Муус булууска сылдьан, быалара быстан, иккиэн бииргэ бааллыбыт буолан, батысыһан сууллубуттар. Биир дьахтар атаҕын бүтэйдии, иккис дьахтар бэрбээкэйин тоһуппуттар.

Ханан баалларын чопчу биллэрбиттэр, онон Быыһыыр сулууспа ону Саахал мэдиссиинэтин сулууспатыгар тиэрдибит.