Муома оройуонугар 140 тахса оҕону мобильнай дуоктардар чинчийдилэр

Өрөспүүбүлүкэтээҕи киин элбэх хайысхалаах оҕо биригээдэтэ Муома оройуонугар үлэлиир. Мэдиссиинэ 15 үлэһитэ, ол иһигэр  Арассыыйа Доруобуйаҕа харыстабылын министиэристибэтин Г.И.Турнер аатынан Оҕо травматологиятын уонна ортопедиятын национальнай мэдиссиинискэй чинчийэр киинин травматолог-ортопеда Кулун Өлбүккэ, Буор Сыһыыга уонна Соболооххо оҕолору көрдүлэр.

146 оҕо доруобуйатын чинчийдилэр. Турнер аатынан НМИЦ-кэ салгыы көрдөрүнэ барыахтаах быраас көмөтүгэр наадыйар оҕолору быһаардылар. Быраастар бу кэннэ салгыы Сааһыырга уонна Чуумпу Кытылга көттүлэр.

Сотору мобильнай быраастар  Дьааҥы, Булуҥ, Орто Халыма, Үөһээ Халыма, Усуйаана оройуоннарыгар барыахтара.

Сэтинньи 4 күнүттэн Абый оройуонугар  психиатр, нарколог, психолог, офтальмолог быраастар бөлөхтөрө үлэлиир. Маны сэргэ Анаабыр оройуонугар стоматологтар анал  көмөнү оҥоро көтүөхтэрэ.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата