Хаартыска: ааптар тиксэриитэ
Оскуолалар үбүлүөйдэригэр улахан болҕомто төгүрүк сылларга ууруллар буолбута син ыраатта. Олох ити хаамыытынан олунньу ый бүтүүтэ Муома орто оскуолата 95 сыллаах үбүлүөйүн бэйэтин кыаҕынан сэмэйдик уонна бэрт чаҕылхайдык бэлиэтээтэ.
Ол курдук, үбүлүөй маҥнайгы күнүгэр Хонуу бөһүөлэгэр олорор, оскуоланы араас сылларга бүтэрбит үөрэнээччилэр, үлэлээн ааспыт учууталлар «Көлүөнэлэр көрсүһүүлэригэр», аһаҕас уруоктарга сырыттылар, улахан быыстапканы таһынан оскуоланы тилэри кэрийэн урукку-кэлиҥҥи сыллардаах кэрчик кэмнэрин аанын сэгэтэн көрдүлэр-иһиттилэр, ирэ-хоро сэһэргэстилэр.
Иккис күнүгэр Муома орто оскуолатыгар омук тылын учууталыттан саҕалаан, оскуола дириэктэригэр тиийэ үүнэн-үрдээн тахсан, олоҕун тиһэх күнүгэр диэри таһаарыылаахтык үлэлээбит Ольга Федотовна Слепцоваҕа аналлаах «Бу барыта кини туһунан…» долгутуулаах ахтыы тэрээһини түмэл үлэһитэ Антонина Ильична Никулина иилээн-саҕалаан, өрүү буоларын курдук, икки тылынан кыайа-хото тутан салайда. Манна омук тылыгар ситиһиилэрдээх үөрэнээччилэри чиэстээһин, үс тылынан (сахалыы, нууччалыы, английскайдыы) ыйытыылар, тута хоруйдар ыытылыннылар, хоһооннор ааҕылыннылар, ырыалар ылланнылар. Кыайыылаахтарга Ольга Федотовна үтүө холобурун санатан, бэлэхтэр туттарылыннар. Бу бэлэхтэри кини үөрэнээччилэрэ туруорбуттара туспа ытыктабыл бэлиэтинэн биһирэннэ.
Киэһэтигэр «Осикат» култуура киинигэр «Сайда тур, тапталлаах оскуолам!» диэн бэрт үрдүк таһымнаах бүгүҥҥү үөрэнээччилэр, учууллар эҕэрдэ ырыалара-тойуктара, үҥкүүлэрэ-битиилэрэ дохсун ытыс тыаһынан доҕуһуолланан үгүс киһиэхэ омуннаах оҕо саас кэрэ түгэнин эргитэн ааста. Араас сылларга үлэлээн ааспыт учууталлар, үөрэммит үөрэнээччилэр эҕэрдэлэрэ ситим нөҥүө элээрэн кэлбитин холбоон, субу тутан олорор курдук көрдөрбүттэрэ эмиэ ураты истиҥ өйдөбүлүнэн өйгө-санааҕа хааларыгар саарбахтааһын суох.
Ити кэнниттэн бастыҥнары чиэстээһин, Хонууга олорор араас сылларга үөрэммит көлүөнэлэр махталлара, эҕэрдэлэрэ, сынньалаҥ киэһэтин көрө-нара хойукка диэри дуорайда.
«Оскуолабыт өрөгөйдөөх 100 сылыгар бэлэмнэнии үлэтэ саҕаламмытын биллэрэбит!» — диэн Василина Васильевна Тихонова дириэктэрдээх, эдэрдии эрчимнээх, саҥалыы көрүүлээх, сарсыҥҥыга эрэллээх, кэскиллээх оскуола бүгүҥҥү салалтатын түбүктээх үлэтэ саҕаланна…
Августина ВЛАДИМИРОВА-ХАБАРОВА. Муома.
СӨ Борокуратуурата иһитиннэрбитинэн, былырыын бэс ыйыгар 33 саастаах Дьокуускай куорат олохтооҕо тиэргэҥҥэ турар «КАМАЗ-5410» массыынаттан…
Дьокуускайга элбэх кыбартыыралаах дьиэлэргэ сылааһы биэрии 100% хааччылынна. Бу туһунан Дьокуускай куорат баһылыгын солбуйааччы Владислав…
Хоту көһөрүллүү күнүн бэлиэтиир тэрээһиннэр чэрчилэринэн, Чурапчыга “Айылгы” НАДь фойетыгар Саха сиригэр соҕотох баталист-худуоһунньук Иван…
СӨ Быыһыыр сулууспата иһитиннэрбитинэн, балаҕан ыйын 17 күнүгэр 21.15 ч. Дьокуускай куоракка Сайсары күөлгэ 2000…
Амма сэлиэнньэтигэр Мир уулуссаҕа таба киирэн олохтоохтору соһутта. Туһааннаах видео бу күннэргэ социальнай ситиминэн тарҕанна.
"Путь воина" байыаннай-тактическай күрэхтэһиигэ бэҕэһээ Волгоградскай уобалас «Сталинград» уонна Тюменьскай уобалас «Соболь» хамаандалара күөн көрүстүлэр.…