Муома улууһугар суут муниципальнай сулууспалааҕы итэҕэли сүтэриитинэн үлэтиттэн ууратарга уураахтаата

Муома улууһун биир нэһилиэгин баһылыгын солбуйааччыта туох да төрүөтэ суох бэйэтин, кэргэнин уонна сокуоннай сааһын туола илик оҕолорун дохуоттарын, баайдарын-дуолларын уонна иэстэрин туһунан сибиэдиэнньэлэри кэмигэр биэрбэтэҕэ билиннэ. Бу туһунан СӨ Борокуратуурата иһитиннэрэр.

Бастаан баһылыгы солбуйааччы бэйэтин баҕатынан үлэттэн ууратыллыбыт. Ол эрээри, борокуруор ирдэбилинэн суут үлэттэн ууратыы төрүөтүн (формулировкатын) уларытан – «итэҕэли сүтэриитинэн» (в связи с утратой доверия) диэн уураахтаабыт. Ону таһынан, муниципалитекка бу сулууспалааҕы итэҕэли сүтэрэн ууратыллынна диэн реестргэ киллэрэргэ сорудахтаабыт.

Суут быһаарыыта толорулларын борокуратуура хонтуруолга ылла.