Муома улууһун Хонуу сэлиэнньэтигэр ууга барыан сөптөөх сирдэртэн дьону эвакуациялаан эрэллэр

Бүгүн, от ыйын 16 күнүгэр, Муома улууһун Хонуу сэлиэнньэтигэр ууга барыан сөптөөх сирдэртэн аҕам саастаах, доруобуйаларыгар хааччахтаах дьону, хат дьахталлары, оҕолоох ыаллары быстах кэмҥэ олорор пууннарга уонна оройуоннааҕы балыыһаҕа эвакуациялаан эрэллэр.

Сэлиэнньэҕэ Дачнай, Озернай, Егор Старостин, Береговой, Василий Лебедев, Заложнай, Западнай, Афанасий Старков уулуссалара, Строителлэр переулоктара, Суон Тиит учаастак, ньиэп ыскылаада ууга барыахтарын сөп диэн быһаардылар. Бу туһунан Муома улууһун дьаһалтатын пресс-сулууспата иһитиннэрэр.

Оройуоҥҥа сөҥүү түһүүтэ тохтоото. Суһал дааннайдарынан, Муома улууһугар билигин икки тиэргэн уонна Соболооххо бааһына ууга барбыттар.

Буор Сыһыы, Соболоох, Кулун Өлбүт уонна Хонуу сэлиэнньэлэр алын өттүгэр сытар сирдэрэ ууга барыахтарын сөп. Нэһилиэнньэни сэрэтэр үлэ ыытыллар, эвакуациялыыр пууннар бэлэмнэннилэр.

Балаһыанньаны хонтуруолга туталлар, суукканы эргиччи дьуһуурустуба үлэлиир.