Муомаҕа балаһыанньа тыҥааһыннаах

Бу күннэргэ Өймөкөөн уонна Муома улуустарыгар сөҥүү нуорманы таһынан элбэх түһэн, сир-уот ууга барда. Ардах уута эбиллэн Индигиир өрүс тардыытыгар уу таһыма үрдээтэ.

Бэҕэһээ Индигиир өрүс Өймөкөөн – Юрта – Уус-Ньара учаастагар уу таһымын үрдээһинэ 0,5-1,2 м тиийбитэ.

Билиҥҥи балаһыанньаны учуоттаан туран, кэлэр 24 чаас иһигэр Индигиир өрүскэ Уус-Ньара гидропроһун аттыгар, уу таһыма 620-640 см тиийэрэ күүтүллэр.

Муома улууһун баһылыга Дмитрий Аммосов бүгүҥҥү балаһыанньа туһунан бу курдук кэпсиир:

— Уу таһыма үрдээн, кутталлаах бэлиэни ааһан, бөһүөлэк территориятыгар кыралаан киирэн эрэр. Онон балаһыанньабыт тыҥааһыннанна. Ол эрээри олорор дьиэлэри, экэнэмиичэскэй эбийиэктэри ыла илик. Индигиир өрүс үөһээ өттүгэр Төбүлэххэ уу киирэ турар. Уу киириэн сөптөөх дьиэлэртэн дьону уонна аҕам саастаах кырдьаҕастарбытын эвакуациялыыр пууҥҥа көһөртөөн эрэбит. Билиҥҥитэ барытын сөптөөхтүк дьаһанан бэлэм олоробут. Улахан уу кэлбэтэр диэн эрэнэбит.