Муомаҕа биэлсэр-акушер пууннара саҥа тэриллэринэн хааччылыннылар

Муомаҕа Бырабыыталыстыба отчуотугар дьон-сэргэ санаата улаханнык көтөҕүллүбүт. Манна доруобуйа харыстабылыгар уларыйыылар буола тураллара бэлиэтэммит.

Вице-премьер Георгий Степанов иһитиннэрбитинэн, 2024 сылга Соболоох, Чуумпу Кытыл, Кулун Өлбүт сэргэхсийбит. Биэлсэр-акушер пууннарыгар мэдиссиинэ саҥа тэриллэрэ уонна миэбэллэр ылыллыбыттар. Өссө Хонууга улахан балыыһа комплекса киирбитэ дьоһун ситиһии буолар.

Маныаха каадырдарга болҕомто ууруллар.

«Сыл устатыгар «Земскэй дуоктар» уонна «Земскэй биэлсэр» бырагыраамаларынан биэс эдэр исписэлиис үлэлии кэлбит. Онтон 2025 сылга өссө түөрт квота көрүллүбүт. Хирург, рентгенолог, анестезиолог-реаниматолог, офтальмолог кэлиэхтээхтэр», — диэн этэр Георгий Степанов.

Отчуокка кэлбит улуус олохтохторо сибээс хаачыстыбата тупсарын, социальнай эбийиэктэри өрөмүөннээһин уонну тутуу туһунан ыйыппыттар. Маны сэргэ, быраастар биригээдэлэрин чопчуласпыттар. Ордук харах бырааһын, стоматолгы күүтэллэрин этиллибит. Оройуон иһигэр дьону таһыы, эминэн-томунан хааччыйыы туһунан, уо.д.а. ыйыталаспыттар.

Бырабыыталыстыба отчуота Муомаҕа олунньу 28 күнүттэн саҕаламмыта. Вице-премьер Георгий Степанов салайааччылаах бөлөх икки хос бөлөххө арахсан бары нэһилиэнньэлээх пууҥҥа сырытта. Түмүккэ Хонууга көрсүһүү буолла.