Муомаҕа Испанияттан турист ыалдьыттыыр

Муома улууһун Чуумпу Кытыл сэлиэнньэтигэр Испанияттан кэлбит бэлисэпиэттээх турист Хуан Менендес ыалдьыттыыр. Кини Хонууттан Абыйага, Чокуурдаахха тиийиэхтээх диэн «Индигиир уоттара» хаһыат телеграм-ханаала кэпсиир.

Хуан Өймөкөөҥҥө, Үөһээ Халымаҕа, Орто Халымаҕа ыалдьыттаабыт. Турист Саха сиригэр 2022, 2024 сылларга кэлэ сылдьыбыт. Тимир көлөтүнэн Австралиянан, Антарктиданан, Амазонканан, Уралынан, Байкалынан айаннаабыта. Бэйэтин кытта балааккалаах, дьоҕус оһохтоох, өйүөлээх, утуйар мөһөөччүктээх, өрөмүөннүүр тэриллэрдээх сылдьар.

Ыалдьыты нэһилиэнньэ үөрэ көрүстэ, аһаттылар, хоннордулар. Менендес сынньанан баран, хоту айанын салҕаата.