“Муоматтан эҕэрдэ” кэнсиэр

Ыраах Чыыстай хайаларын быыстарыгар тайаан сытар кэрэ айылҕалаах, үлэни өрө туппут үлэһит дьонноох, сүрүннээн саха, эбээн омуктар уутуйан олорор, инникигэ сайдыыны, утуму салгыыр норуоттарын төрүт тылларын илдьэ сылдьар, култуураларын үйэтитэр Муома улууһун эдэр ыччаттара үҥкүү-ырыа, көр-күлүү кэһиилэрдээх “Муоматтан эҕэрдэ” кэнсиэри Мытаах нэһилиэгин олохтоохторугар көрдөрөн, сэргэхситэн бардылар.

Нэһилиэкпит кэнсиэри биһирээн көрөөччүлэрэ 1500 килэмиэтири сиринэн айаннаан кэлбит ыалдьыттарбыт, дойду сириттэн Мэҥэ Хаҥаластан төрүттээх, Сэбиэскэй кэмҥэ Муома оройуонугар норуодунай тыйаатыры тэрийбит, атаҕар туруоран аймыньылахатык үлэлээбит режиссер Тамара Апросимова аатынан “Халбас харата” мини-тыйаатыр артыыстара Шекспир айымньыларыгар, саха омук “Дьулуруйар Ньургун Боотур” олоҥхотугар, нуучча омук остуоруйатыгар олоҕуран аныгы олох түгэннэригэр сценкалары, “Булчут мүччүлгэннэрэ” , “Кэргэн кэпсэтии” көрдөөх нүөмэрдэри, “Тэтим” үҥкүү норуодунай ансаамбыл толоруутугар һээдьэни, эбээн, бүрээт,  саха, чукча омуктар үҥкүүлэрин Василий Аммосов, Туйаара Васильева ылбаҕай ырыаларын көрөөччүлэр үгүс ытыс тыаһынан астына, дуоһуйа көрдүлэр.

Ыраах буурҕа быыстаах, дьүкээбил уон араас дьэрэкээн ойууларынан сыдьаайар Муоматтан сылдьар ыалдьыттарбыт истиҥ, сылаас көрсүһүү иһин махтанан нэһилиэк олохтоохторугар сэмэй бэлэхтэри туттардылар, онтон нэһилиэкпит баһылыга И.Е.Петров киэҥ ис хоһоонноох кэнсиэри көрдөрбүттэригэр махталын тиэрдэн турдан, хоту төһө да киин сиртэн ыраах олордоллор норуот култууратын үрдүк таһымҥа илдьэ сылдьалларын бэлиэтээтэ, өссө үрдүк таһаарыылаах үлэлэри ситиһэргэ олохтоохтор ааттарыттан баҕа санаалары тириэртэ.

Николай Осипов, СӨ ыччат бэлиитикэтин туйгуна, РФ Суруналыыстарын сойууһун чилиэнэ

Горнай, Мытаах