Мурманскайга норуоттар икки ардыларынааҕы пуорум буолла

Кулун турар 26-27 күннэригэр Мурманскайга буолан ааспыт “Арктика — территория диалога” Арктикатааҕы норуоттар икки ардыларынааҕы пуорум чэрчитинэн аҕыс сөбүлэҥҥэ илии баттастылар. Бу туһунан түмүктүүр пресс-кэмпириэнсийэҕэ РФ Бырабыыталыстыбатын бэрэссэдээтэлин солбуйааччы  — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев иһитиннэрдэ.

Илии баттаммыт докумуоннарга “Россети Северо-Запад” АУо, “Россети научнай-тиэхиньиичэскэй киини” уонна Новосибирскайдааҕы судаарыстыбаннай  архитектура-тутуу университетын (Сибстрин) кытта бииргэ үлэлэһии сөбүлэҥэ бааллар.

Икки өттүттэн Арктикаҕа 150 кВ уот лииньийэтин тирэхтэрин оҥорор санаалаахтар. Ыстаалтан оҥоһуллубут саҥа тирэхтэр сөкүүндэҕэ 45 м диэри күүстээх тыалы уонна улахан мууһу тулуйар кыахтаах буолуохтара.

Информационнай өттүнэн бииргэ үлэлэһии туһунан сөбүлэҥи «Уһук Илини уонна Арктиканы сайыннарар корпорация» АУо уонна Арассыыйа туристическай оператордарын ассоциацията түһэристилэр. Ону тэҥэ, корпорация “Арсенал” АУо кытта илии баттаста.

“Арктика — территория диалога” норуоттар икки ардыларынааҕы VI арктическай пуорум аан бастакытын Мурманскай уобаласка ыытылынна. Пуорум Арктика сирин-уотун социальнай-экэнэмиичэскэй сайдыытын, Арктика эрэгийиэнин кыаҕын бииргэ арыйар уонна көдьүүстээхтик туһаныы элбэх өрүттээх мэхэниисимин араас таһымын оҥорор суолталаах боппуруостарын ырытар сүрүн былаһаакканан буолла.

Бу туһунан Ил Дархан уонна Бырабыыталыстыба пресс-сулууспата суруйар. Сиһилии манна ааҕыҥ.