Муннуга кутар хааппылаттан тутулуктаах буолуу быраастары долгутар

Быраас-оториноларингологтар долгуйаллар: коронавирус пандемиятын кэмигэр мурун бүөлэниититтэн тымыры кыаратар эмтэр дойду үрдүнэн тарҕаныылара күүскэ үрдээтэ уонна салгыы үрдээн иһэр. Маны эмтиэкэ ырыынагын маркетинговай чинчийиилэрэ эмиэ бигэргэтэллэр.

Арассыыйа олохтоохторо сыл аайы хааппылаларга уонна спрейдэргэ уонунан миллиард солкуобайы ороскуоттууллар. Сорохтор күн устата биир-икки флакону туттар буолбуттар.

2025 сыл тохсунньутуттан алтынньыга диэри кэмҥэ  тымыры кыаратар муннуга кутар спрейдэр уонна хааппылалар атыылара, былырыыҥҥы көрдөрүүлэри кытта тэҥнээтэххэ, 5% (176,5 мөл. упаковкаҕа диэри) уонна сыанатынан 7,4% (41,4 млрд солк. диэри) үрдээбит.

2023 сыл бастакы тоҕус ыйыгар тэҥнээтэххэ, үрдээһин 14,6% уонна 26,2% буолла, оттон 2022 сыл үс кыбаарталыгар тэҥнээтэххэ — 28,5% уонна 51,8%. Маннык дааннайдарынан ТАСС ааҕыныстыбаны кытта «Кэскиллээх технологиялары сайыннарар киин» пресс-сулууспата үллэһиннэ.

Быраас, мэдиссиинэ наукатын доктора, РУДН оториноларингологияҕа кафедратын бэрэпиэссэрэ Ирина Кириченко ТАСС-ка бигэргэтэринэн, муннуга кутар хааппылаттан тутулуктаах буолуу боппуруоһа кырдьык улахан хабааннанан эрэр. Кини этэринэн,  ордук эдэр дьон ылларар. Ыччат ыарыыны тулуйарга бэлэмнэрэ суох уонна хааппылалары уһуннук туттуу содулун туһунан билбэттэр.

«Ковид кэнниттэн хааппылаттан тутулуктаах дьон элбээтэ. Сорохтор тыыналларыгар ыарырҕаппат да буоллахтарына тутталлар, сыты билэр кыахтарын төнүннэриэхпит дии саныыллар. Ол түмүгэр билигин хааппылаттан тутулуктаах, ордук эдэр ыарыһахтар, олус элбэхтэр», — диэн кини кэпсиир.

Тымыры кыаратар эмтэр инструкцияларыгар туттуллар саамай уһун болдьоҕо биэс-сэттэ күн диэн ыйыллар. Хааппыланы аһара туттууттан мурун аллараа өттүнээҕи былчархайдарын бүрүйбүт салыҥнаах бүрүөтүн устун ааһар тымырдар бэйэлэрэ кыараабат буолан хаалаллар. Ити кэмҥэ киһи  дозатын улаатыннарар уонна онтон аккаастанар кыаҕа суох буолар.

«Күн аайы биир-икки флакону туттар ыарыһахтар бааллар, кинилэргэ төбө ыарыылара үөскүүр. Неврологка сырыы кэннэ ыарыы төрүөтэ отоларингологическай буолан тахсара биллэр», — диэн Ирина Кириченко кэпсиир. Төбө ыарыытын төрүөтэ манна сытар: туттуллар спрей эбэтэр хааппыла мурун раковинатыгар эрэ буолбакка, салыҥнаах бүрүө барытыгар тиийэр. Эм тымырдар истэригэр иҥэн, быарга буолбакка, мэйиигэ тиийэр, онно тымырдар кыарыыллар (спазм).