Мууһу кэбирэтии үлэтэ саҕаланна

Сааспыт кэлэн, халлааммыт сылыйан, сотору өрүстэрбит муус болгуоларыттан босхолонон Хотугу муустаах муора диэки устуохтара. Ол иннинэ халаан содула суох ааһарыгар бэлэмнэнии, кэбирэтии үлэтэ тиһиктээхтик барар.

Бүгүн Хаҥалас хайатын аннынан мууһу кэбирэтии үлэтэ саҕаланна. Быйыл халааҥҥа бэлэмнэнии үлэтигэр 28 мөл. солк.  көрүллэн турар. Өлүөнэ уонна Халыма өрүстэригэр 8 муниципальнай тэриллии оройуонугар мууһу кэбирэтии үлэтин тэрээһинэ ыытыллар. Кэбирэтии үлэтэ Өлүөнэ өрүскэ 5 муниципальнай оройуоҥҥа уонна Дьокуускай куорат учаастагар оҥоһуллуо. Харыы тахсар 37 учаастагар мууһу эрбээһин – 41 км, хараардыы 413 га сиргэ ыытыллыа. Бу үлэлэр бары анал бигэргэммит схема быһыытынан оҥоһуллаллар.
Хаҥалас аннынан мууһу кэбирэтии 2 схеманан оҥоһуллар, хараардыы — 21 га, эрбээһин — 5 км. Бу учаастакка кэбирэтии үлэтэ муус устар 27 күнүгэр бүтүөхтээх.
Үлэ барыта оҥоһуллан бүттэҕинэ, биэдэмистибэлэр икки ардыларынааҕы хамыыһыйа үлэни тутуо. Хамыыһыйаҕа Өлүөнэ тардыытынааҕы уу салалтата, Ыксаллаах быһыы-майгы министиэристибэтэ, Экологияҕа, айылҕаны туһаныыга уонна ойуур хаһаайыстыбатын министиэристибэтэ уонна куорат дьаһалтатыттан бэрэстэбиитэллэр киирэллэр. Мууһу кэбирэтии үлэтин ыытыы схемата  Өлүөнэ тардыытынааҕы ууга управление научнай-тиэхиньиичэскэй сэбиэтинэн сыл аайы өрүс сүнньүн уларытыынан уонна ааспыт сыллааҕы халаан түмүгүнэн көрүллэр уонна оҥоһуллар.