Өлүөнэ өрүскэ муус Дьокуускай аннынан уонна түөрт улууһу ааһар

Өлүөнэ өрүскэ муус Хаҥалас, Уус Алдан, Нам, Мэҥэ Хаҥалас улуустар уонна Дьокуускай куорат сиринэн-уотунан ааһар. Ол туһунан Саха сирин Экологияҕа, айылҕаны туһаныыга уонна ойуур хаһаайыстыбатын миниистири солбуйааччы Анатолий Алексеев иһитиннэрдэ.

Муус алын кырыыта Нам улууһун Граф биэрэгэр, оттон үөһээ кырыыта Өлүөхүмэ улууһун Саҥыйахтаах сэлиэнньэтигэр бэлиэтэнэр. Кэбээйи улууһугар  Сангаар бөһүөлэгэр муус хамсааһына саҕаланна.

Амма өрүскэ, Бууйаҕа-Амма учаастакка уу сууккатааҕы таһыма 0,3–0,5 миэтэрэ буолла. Өрүс алын сүүрүгэр уу таһыма түһэр, ол гынан баран,  ыам ыйын 17 күнүгэр уу таһыма үрдүөҕэ. Бүлүү өрүскэ муус Бүлүү уонна Кэбээйи улуустарынан барар.

«Уопсайынан, Саха сирин өрүстэригэр бүгүҥҥү күн сарсыарда 8 чаастаах туругунан,  уу таһыма  кутталлаах таһымтан түспүтэ бэлиэтэнэр. Муус барарынан сибээстээн,  дьоҕус суудуналар сылдьыахтарыгар диэри арыыларга уонна уулаах сирдэргэ сылдьартан туттунаргытыгар көрдөһөбүт”, — диэтэ Анатолий Алексеев.

СӨ Ил Дарханын уонна бырабыыталыстыбатын пресс-сулууспата