Муус оҥоһуктар бэстибээллэригэр ыҥыраллар

Тохсунньу 16-20  күннэригэр «Үрдэл» сынньалаҥ пааркатыгар «Вау-эффект» муус оҥоһуктар үгэс буолбут бэстибээллэрэ ыытыллар. 

Быйылгы күрэскэ өрөспүүбүлүкэ 12 улууһуттан ох курдук оҥостон, кустук курдук куоһанан 13 күүстээх хамаанда күрэстэһэр. Бары да хас эмэ төгүллээх кыайыылаахтар, норуоттар икки ардыларынааҕы күрэстэр призердара.

Бэстибээл тиэмэтэ — көҥүл, поп-култуураҕа, киинэҕэ, номохторго да олоҕурбут буолуон сөп. Композиция бары өртүнэн дьону соһутар, сөхтөрөр уратылаах буолара ирдэнэр.

Хамаандалар бүгүҥҥүттэн, тэрээһини үөрүүлээхтик арыйыы уонна алгыс кэнниттэн үлэлэрин өрө көтөҕүллүүлээхтик саҕалаатылар. Ыалдьыттар үлэ-хамнас хайдах салҕанарын көрүөхтэрин сөп.

Бэстибээл Арассыыйаҕа Дьиэ кэргэн сылынан, «Всей семьёй!» бырайыак иитинэн ыытыллар. Санатар буоллахха, бырайыагы РФ Бэрэсидьиэнэ өйүүр.