Муус устар 1 күнүттэн биэнсийэ кээмэйэ улаатарын туһунан санаттылар

Оптуорунньуктан, муус устар 1 күнүттэн, Арассыыйаҕа биэнсийэҕэ сыһыаннаах саҥа быраабылалар үлэлиэхтэрэ. 4,2 мөл. тахса биэнсийэлээхтэрэ социальнай төлөбүрдэрин кээмэйэ улаатыаҕа. Индексация 14,75%-ҥа тэҥнэһэр.

«Муус устар ыйтан социальнай биэнсийэ улаатыаҕа, ипотеканы биэрии куттала суох буолуо, биометрияны туһаныы быраабылата судургутутуллуоҕа уонна SIM- каартаны регистрациялааһын уларыйыа», — диэн «Российская газета» суруйар. 4,2 мөл. тахса Арассыыйа биэнсийиэлээхтэрин социальнай биэнсийэлэрэ улаатыаҕа — 14,75% индексацияланар. Биэнсийэни үрдэтии биэнсийэлээхтэри эрэ буолбакка, Аҕа дойду Улуу сэриитин кыттыылаахтарын, блокадниктары, радиационнай катастрофаттан эчэйбиттэри уонна да атын дьону эмиэ таарыйар.

Ону тэҥэ Арассыыйа киин баана муус устар 1 күнүттэн кирэдьииттэргэ макропруденциальнай лимииттэри олохтуур. Оччотугар 20 %-тан кыра кээмэйдээх бастакы усунуоһу төлөөччүлэргэ уонна 80 %-тан иэстээхтэргэ кирэдьиити биэрии тохтотуллар. Маннык хааччахтар автокирэдьииттэри эмиэ таарыйар.

Эбиитин бааннар биометрическай дааннайдардаах дьонтон, эбии докумуоннары ирдиир кыахтара тохтотуллар. Бу дистанционнай өҥөнү судургутутуоҕа.

Муус устар саҥатыттан биир киһиэхэ 20-тэн тахса суотабай төлөпүөн нүөмэрин оҥорторор сатаммат буолар. Оператордар SIM-каартаны бэрэбиэркэлиир эбээһинэстэнэллэр. Өскөтүн бу сыл сэтинньи 1 күнүгэр биир киһиэхэ 20-тэн тахса нүөмэрдээх буоллаҕына, симкалар үлэлэрин тохтотуохтара.