Муус устар 1 күнүттэн биэнсийэ үрдүүрүн туһунан быһаардылар

Муус устар 1 күнүттэн социальнай биэнсийэлэр 6,8% индексацияланыахтара. Үрдээһин кээмэйин хайдах аахпыттарын уонна 2026 сылга кимнээххэ өссө биэнсийэни улаатыннаралларын туһунан Үлэ министиэристибэтигэр быһаардылар.

Түөрт мөлүйүөн биэнсийэлээххэ

Бырабыыталыстыба уурааҕын бырайыага нуормалыыр-быраап аахталар бырайыактарын федеральнай порталыгар таҕыста. Докумуону дьон-сэргэ ортотугар дьүүллэһии олунньу 21 күнүгэр диэри ыытыллыаҕа. Социальнай биэнсийэлэри индексациялааһын кээмэйин миниистирдэр кэбиниэттэрэ сыл аайы бигэргэтэр.

«Социальнай биэнсийэлэри индексациялааһын сыл аайы муус устар 1 күнүгэр ыытыллар. Быйыл 6,8 бырыһыаҥҥа тэҥнэһиэҕэ. Индексация 4,3 мөлүйүөн кэриҥэ биэнсийэлээх биэнсийэнэн хааччыллыытын таһымын үрдэтэргэ кыах биэриэҕэ, онтон 3,6 мөлүйүөн кэриҥэ киһи – социальнай биэнсийэни ылааччылар уонна 700 тыһыынча кэриҥэ киһи судаарыстыбаннай биэнсийэнэн хааччыллыыны ылааччылар», — диэн РФ Үлэҕэ уонна социальнай көмүскэлгэ миниистирэ Антон Котяков кэпсээтэ, кини тылларын биэдэмистибэ пресс-сулууспата тириэрдэр.

Үлэлиир биэнсийэлээхтэргэ

Социальнай биэнсийэни ылааччылартан ураты, быйыл төлөбүргэ эбиини биэнсийэлээхтэр атын да категорияларыгар ааҕыахтара. Ол курдук, атырдьах ыйыгар биэнсийэҕэ тахсан баран официальнайдык үлэтин салҕаабыт уонна ааспыт сылга Социальнай пуондаҕа страховой усунуостары төлөөбүттэргэ биэнсийэни үрдэтиэхтэрэ. Биэнсийэни ааспыт сылга биэнсийэ систиэмэтигэр киирбит сууматтан көрөн автоматическайдык улаатыннарыахтара.