«Муус устар» 2 тыһыынчаттан тахса ыччаты муста

Дьокуускайга «Муус устар» ыччат бэстибээлин финала түмүктэннэ. Тэрээһиҥҥэ Саха сирин үрдүнэн 2 тыһыынчаттан тахса ыччат муһунна. Аҥардас финальнай шоуга 700 киһи буоллаҕына, былырыыҥҥытааҕар быйыл икки төгүл элбэх ыччат кытынна.

Бэстибээл кыттыылаахтарын дойду Бэрэсидьиэнэ Владимир Путин эҕэрдэлээтэ. Саха сирин визитнэй карточкатынан ааттаабыт Ил Дархан Айсен Николаев тыл эттэ.

«Муус устар» биһиги Сахабыт сирин визитнэй карточкатынан буолла. Хара маҥнайгыттан бэстибээл сынньатар-аралдьытар тэрээһин курдук буолбакка, ыччаттарбытын түмэн, төрөөбүт Саха сирин уонна улуу Арасыыйабыт сайдыыларыгар саҥа компетенциялары биэрэбит. Биһиги өрөспүүбүлүкэбит инники кэскили түстүүр эрэгийиэн буоларыгар эрэнэбин. Биһиги салгыы инникитин даҕаны дойдубутун уруйдуохпут! Барыгытыгар ситиһиилэри! Ыччаттарбытынан киэн туттабыт, Саха сирэ эһигини итэҕэйэр, бары ситиһиигитинэн киэн туттабыт! Бары бииргэ иннибит диэки!», — диэн Айсен Николаев ыччакка туһаайан эттэ.

 «Триумф» успуорт киинигэр шоу ыытарга 500 квадратнай миэтэрэ иэннээх сыана тутуллубута, 10 туонна араас аппаратура туһаныллыбыта. Финальнай шоуга Дьокуускай куорат бастыҥ үҥкүү кэлэктииптэрэ, өрөспүүбүлүкэтээҕи «КҮН» куонкурус кыттыылаахтара, оҕо вокальнай устуудьуйалара, циркэ артыыстара, муусукааннар, уо.д.а. кытыннылар.

Сыана былаһаакката Арассыыйа биир улахан Өлүөнэ өрүһүн холобурунунан оҥоһуллубута. Уу долгуна быһыылаах уонна өҥнөөх, араас таһымнаах уустук экраннар өрүс биир кэлим уобараһын көрдөрөрү ситиһилиннэ.

Финальнай шоу уратыта – биир сыанаҕа Арассыыйа уонна Саха сулустара эрэ буолбакка, саҥа ааттар таҕыстылар. Бу «Воплощай и вдохновляй!» трек кыттааччылара, финалистара, айар куонкурустар кыайыылаахтара: «КУН», «СулуСТАР», «Хомус тэтимэ». Ону таһынан быйыл эдэр талааннаах дизайнер-модельердар үлэлэрин билиһиннэрдилэр.

Ону тэҥэ дойду үрдүнэн биллэриллибит Дьиэ кэргэн сылыгар финальнай шоу кыттыылаахтара, саҥа дьиэ кэргэн тэриллиитин туоһутунан эдэр устудьуоннар, Алена уонна Николай Васильевтар олохторун холбуур сиэрэ-туома буолла.

«2022 сыл балаҕан ыйыгар билсибиппит. Сыл уонна үс ый бииргэ. Олохпутун холбуур күнү олунньу 18 күнүгэр талбыппыт. Бэстибээл иитинэн сиэри-туому ыытарга этии киирбитэ. Олус интэриэһинэй буолуоҕа диэн тутатына сөбүлэспиппит. Ыытыллыбыт сиэри-туому сөбүлээтибит, барыта олус үрдүк таһымнаах уонна кыраһыабай буолла», – диэн эдэр дьон үллэһиннилэр.

Быйыл бэстибээл 14 тректаах буолан ааста, үгэс быһыытынан хас биирдиитэ корнердаах буолла. Бэстибээл хас биирдии тректарыгар кыттааччылар уонна ыалдьыттар араас идэни боруобалаатылар.

«Бу өрөспүүбүлүкэ көхтөөх ыччатын түмэр олус улахан тэрээһин. Олус үчүгэй оҕолор. Туох баар корнилары сэргэхтик интэриэһиргээтилэр, ыйыталастылар. «Муус устар» бэстибээлгэ кыттыбыппыттан дьоллоох киһинэн сананабын», – диэтэ бэстибээл кыттыылаахтарыттан биирдэстэрэ Тимофей Васильев.

Сорох көхтөөх ыччат бэстибээлгэ хаһыс да төгүлүн кыттар. Үгүстэрэ урукку сылларга «Муус устар» бэстибээл уонна атын куонкурустар кыайыылаахтара. Кинилэр ортолоругар Мэҥэ- Хаҥалас улууһуттан «Бастыҥ доброволец» номинация кыайыылааҕа Владлена Павлова.

«Бэстибээлгэ номнуо үһүс сылын кыттабын. Миэхэ «Муус устар» олус элбэҕи биэрдэ. Чуолаан, манна ылбыт уопуппунан былырыын Росмолодежь ыччат куонкуруһугар кыайбытым уонна «Эн соҕотох буолбатаххын!» ыарахан быһыыга-майгыга түбэспиттэргэ анаммыт бырайыагы олоххо киллэрэри ситистим», – диэн кыыс кэпсиир.

 СӨ Ил Дарханын уонна Бырабыыталыстыбатын пресс-сулууспата