«Муус устар-2024»: Дьокуускайга бастыҥ үлэлээх эдэр худуоһунньуктар ааттаннылар

Бэҕэһээ, олунньу 15  күнүгэр, П.П.Романов аатынан Дьокуускайдааҕы ойуулуур-дьүһүннүүр училищеҕа «Акцент 2» диэн уруһуйга куонкурус түмүктүүр түһүмэҕэ буолан ааста.

Күрэстэһээччилэри саастарынан икки бөлөххө араардылар. Күөн күрэс «Муус устар» ыччат бэстибээлигэр «Искусство творить!» хайысханан ыытылынна.

Манна 15-17 саастаах оҕолорго кыайыыны Камила Егорова (Дьокуускай) ылла. Куонкуруска Камила салааскалыы сылдьар оҕолору уруһуйдаабыт.

-Соторутааҕыта хаартыскалары көрө олорон, аҕам миигин салааскаҕа олордон баран соһорун, күүлэйдэтэрин, өссө эдьиийбинээн хардарыта сосуһа оонньуурбутун санаан кэлбитим. Куонкуруска иккис кыттыым. Кыайыы соһуччу буолла, — диир кини.

Уус Алдантан кыттыбыт Юлиана Петрова 18-35 саастаахтарга бастаабыт.

—Кырабыттан уруһуйдуубун. Алтыс кылаастан уруһуйунан дьарыктаммытым, — диир кини. Бэлиэтээн эттэххэ, кыргыттар иккиэн П.П.Романов аатынан ойуулуур-дьүһүннүүр училище устудьуоннара.

Дьокуускайтан кыттыбыт Айыына Семенникова 15-17 саастаахтарга иккис миэстэни ылла, үһүскэ – Айыына Исакова (Дьокуускай) таҕыста. Иккис категорияҕа иккис миэстэни Елизавета Евсеева (Бүлүү), үсүһү Алексей Выдренков (Ленскэй) ыллылар.  Куонкурус кыттыылаахтарыгар барыларыгар күрэскэ кыттыбыттарын туоһулуур сэртипикээттэр уонна өйдүү-саныы сылдьарга бэлэхтэр туттарылыннылар. Ону сэргэ, сорох үлэлэргэ дьүүллүүр сүбэ биһирэбил бириистэри туттарда.

Санатан эттэххэ, куонкурус ыалдьытынан уонна дьүүллүүр сүбэ бэрэссэдээтэлинэн худуоһунньук, РФ худуоһунньуктарын сойууһун чилиэнэ Алексей Купрейченко буолар. Бүгүн, олунньу 16 күнүгэр, кини  «Академическай искусство» кыттыылаахтарыгар маастар-кылаас ыытар.

«Муус устар» ыччат бэстибээлэ Саха сиригэр 2021 сылтан буолар. Тэрээһин араас эйгэҕэ  эдэр талааннары булууга, арыйыыга, өйөөһүҥҥэ, чэгиэн олоҕу тарҕатыыга туһуланар. РФ Бэрэсидьиэнэ В.Путин этэринэн,  «Муус устар» эдэр ыччат бэйэтин талаанын уонна дьоҕурун көрдөрөрүгэр, билиитин-көрүүтүн хаҥатарыгар, айар куонкурустарга, спортивнай тэрээһиннэргэ кыттарга кыаҕы биэрэр.

Бэстибээли СӨ Бырабыыталыстыбата «Эльгауголь» хампаанньаны кытары тэрийэр.

СӨ Ил Дарханын уонна бырабыыталыстыбатын пресс-сулууспата