«МУУС УСТАР»: «Арассыыйа  – ис кыаҕы арыйар дойду» ыччаты көҕүлүүр тыыннаах

Икки күн устата «Муус устар» бэстибээл кыайыылаахтары уонна  финалистары, көхтөөх ыччаты түмэн,  «Арассыыйа  – ис кыаҕы арыйар дойду»  былаһааккаҕа ыччаты кытта үлэлиир исписэлиистэр,  устудьуоннар ыччат лиидэрдэрэ, өрөспүүбүлүкэ сайдыытыгар сыһыаннаах бырайыактары боппуруостары дьүүллэстилэр.

— Ыччат «Муус устар» бэстибээлгэ  бэйэтин ис  кыаҕын хото арыйда. Биллэн турар, ким эрэ бэйэтин кыаҕын атыттары кытта тэҥнээн көрдө. Ким эрэ дууһатыгар иитиэхтии сылдьыбыт санаатын уһугуннарда. Бу бэстибээли түмүктүүр тэрээһиҥҥэ эһиги санааҕытын үллэһиннигит, бэйэҕит ис кыаххытын арыйдыгыт.  Онон бу былаһаакка дойдубутугар лиидэрдэр тахсыыларын өйүүр соруктаах дииллэрэ оруннаах, – диэн бэлиэтээтэ СӨ Бырабыыталыстыбатын Бэрэссэдээтэлин солбуйааччы  Ольга Балабкина.

«Арассыыйа  – ис кыаҕы арыйар дойду» платформа эрэгийиэннээҕи дэпэртээмэнин салайааччыта  Глеб Узунов «Саха сирэ Уһук Илин эрэгийиэниттэн араас куонкурустарга уонна бырайыактарга биир саамай көхтөөхтүк кыттар өрөспүүбүлүкэнэн буолар. Ол курдук,  алта сыл иһигэр  бу эппит тэрээһиннэрбитигэр 94 тыһыынча киһи кыттыыны ылла,  онтон 1 145 киһи финалистарынан, 323 киһи кыайыылааҕынан ааттанна» диэн бэлиэтээтэ.

Бастыҥтан бастыҥнар диэх курдук, кыайыылаахтар уонна финалистар бу быыстапкаҕа көхтөөхтүк кыттан, ханнык баҕарар суолталаах тэрээһиннэри ыытар спикердэринэн буолуохтарын сөптөөҕүн көрдөрдүлэр.