«МУУС УСТАР»: Асчыттар күрэстэрэ тыҥааһыннаах

Бу күннэргэ Дьокуускага «МУУС УСТАР-2025»  үбүлүөйдээх ыччат бэстибээлэ бэһис сылын буола турар.

Быйыл тэрээһин 12 хайысханан ыытыллар, ол иһигэр 20-тэн тахса куонкурус, үөрэтэр былаһааккалар уонна сессиялар буола тураллар. Олор истэригэр асчыттарга анаммыт тэрээһин үгүс кыттааччыны түмтэ.  Бэҕэһээ ас астааччылар «Тыгын Дархан» эрэстэрээн аатырбыт асчыттара бренд-пуобар Николай Атласов уонна шеф-пуобар Константин Матаннанов маастар-кылаастарыгар сырыттылар.

Бүгүн ыччаттар “Асчыт кистэлэҥэ” (“Секреты повара”) күөн күрэскэ кыттыыны ыллылар.  «Муус устар» ыччат бэстибээлин чэрчитинэн ыытыллыбыт күрэскэ өрөспүүбүлүкэ араас муннуктарыттан 11 кыттааччыны түмтэ. Ирдэбиллэрэ: хас биирдии киһи араас ингредиеннэртэн үс аһы бэлэмниэхтээх: тымныы, итии уонна минньигэс. Туохха барытыгар үс чаас бэрилиннэ. Полуфинал икки күн устата барар. Түмүккэ алта кыайыылаах быһаарыллыаҕа.

— Дьүүллүүр сүбэ сыаналыыр ирдэбиллэригэр ас тас көстүүтэ, амтана, сонун көрүҥэ уонна асчыт быһыытынан идэтийиитэ киирэллэр. Ыччаттар астарыгар Саха сирин  амтанын киллэрэр соруктартаах үлээлииллэрин бэркэ кэрэхсээтим, — диэн Ю.А. Готовцев аатынан  Дьокуускайдааҕы технологическай кэллиэс преподавателэ Саргылаана Винокурова бэлиэтээтэ.

Сунтаар  Күндэйэтиттэн сылдьар Евгения Слюсарь бэйэтэ кэпсииринэн араас идэҕэ үөрэнэн, үлэлээн көрбүт.

— Ас астыырбын оҕо эрдэхпиттэн сөбүлүүбүн. 2023  сылтан бэйэм сөбүлүүр дьарыкпынан үлэлээн, «Дьол амтана» кыра кондитерскай устуудьуйа арынным. Дьарыктаах буолуу киинин субсидиятынан туһанан туттар тэрил ылыммытым. Самозанятайтан үлэм саҕаламмыта. Бу олус интэриэһинэй үрдүк таһымнаах тэрээһиҥҥэ кэлэн, олус астынан кытта сылдьабын, — диэн Евгения Слюсарь санаатын үллэһиннэ.

Иннокентий Тарбахов аатынан “Асчыт кистэлэҥэ” кулинарнай куонкурус 18 кытааччытыттан 11 кыттааччы бүгүҥҥү тэрээһин түмүгүнэн полуфиналга таҕыстылар:  Виктор Дохунаев (Нам улууһа); Михаил Борисов (Уус Алдан улууһа); Кристина Гоголева, (Өлөөн Эбэҥки национальнай оройуона);  Николай Осипов (Дьааҥы улууһа); Нарыйана Максимова (Өймөкөөн улууһа); Кирилл Сидоров (Бүлүү улууһа); Евгения Слюсарь (Сунтаар улууһа); Ринат Суттибаев (Мэҥэ Хаҥалас улууһа); Анита Иванова (Ньурба улууһа); Семен Попов (Амма улууһа); Петр Аммосов (Чурапчы улууһа).

Сарсын финалга хапсыы иһин киирсии буолуоҕа.