«МУУС УСТАР» бэстибээл иитинэн ГТО күрэхтэһиитэ буолуо

Бэһис төгүлүн ыытыллар «МУУС УСТАР» ыччат бэстибээлин иитинэн, «Ийэ дойдуну көмүскээччи сылыгар — ГТО бэлэм буол!» диэн ГТО нуорматын туттарыытыгар күрэхтэһии киллэрилиннэ.

«Быйыл тэрээһин байыаннай дьайыы кыттыылааҕа, Арассыыйа Дьоруойа Дмитрий Николаевич Егоров сырдык аатыгар ананна. Улуустарга кулун тутар 10 күнүгэр диэри түһүмэхтэр ыытыллаллар. ГТО нуорматын ситиһиилээхтик туттарыы, буолан баран хамаанданан, бу ыччат чэгиэн доруобуйалаах, бэйэтин кыанар буоларыгар уонна чэгиэн, чөл олоҕу тутуһарга, физкултууранан, успуордунан дьарыктанарга сирдиир», — диэн этэр СӨ Бырабыыталыстыбатын Бэрэссэдээтэлин солбуйааччы Ольга Балабкина.

ГТО түмүк күрэхтэһии Дьокуускайга кулун тутар 18-19 күнэригэр ыытыллара былааннанар.

Күрэхтэһиигэ 18-34 диэри саастаахтар хамаанданан күөн көрсүөхтэрэ. Манна тургутан көрүү бырагыраамата оҥоһуллубут. Ол курдук: сүүрүү (челночнай), тардыныы, наартаны ойуу, уо.д.а. көрүҥнэр киирбиттэр.

Кыттыан баҕалаахтар ГТО порталыгар киирэн регистрацияланаллар: www.gto.ru. Доруобуйаларын туругун бэрэбиэркэлэтэллэр уонна көҥүл ылаллар. Сайаапканы күрэхтэһии буолуо сэттэ күн иннинэ sakha.gto@gmail.com биэрэллэр.

Бүтүн Арассыыйатааҕы физкултуура-успуорт комплексын «Готов к труду и обороне» (ГТО) балаһыанньатын сиһилии манна көрүөххэ сөп.

Санатан эттэххэ, «МУУС УСТАР» ыччат бэстибээлэ быйыл үбүлүөйдээх бэһис сылын ыытыллар. Тэрээһин эдэр талааннары булар, өйүүр уонна таһаарар сыаллаах-соруктаах ыытыллар.

#МУУСУСТАР2025

СӨ Ил Дарханын уонна Бырабыыталыстыбатын пресс-сулууспата