Ыччат долгуйа кэтэһэр бэстибээлин сүүмэрдиир түһүмэхтэрэ бары улуустарга саҕаланнылар. Быйыл олимпийскай чөмпүйүөн, гимнаст Никита Нагорнай, телеведущай Денис Полунчуков, киновед Алексей Апостолов уо.д.а. эспиэр буолаллар.
Ыччакка аналлаах тэрээһин үһүс төгүлүн ыытыллар. Кыайыыга эрэллээх, таптыыр дьыалатынан дьарыктанар, ураты көрүүтүн, бырайыагын олоххо киллэрэргэ бэлэм, ону таһынан билиигэ-көрүүгэ дьулуһар, о.д.а. ыччакка туһуланар туһалаах, сэргэх тэрээһин буолара бэлиэтэнэр.
«Биһиги биир сыаллаахпыт — биһиги олохпут, култуурабыт, наукабыт сорҕотунан буолар саҥа хайысхалары, бырайыактары эдэрдэр күүстэринэн сайыннарыы. Бу араас хайысхаларынан көрсүһэр, түмсэр коммуникационнай былаһаакканан буолар. Көрөөччүлэр болҕомтолорун тардарын сэргэ, кинилэр эмиэ көхтөөх кыттааччыларынан буолаллар. Мантан бииргэ үлэлээһин саҥа хайысхата саҕыллар», — диэн СӨ Ыччат дьыалаларыгар уонна социальнай коммуникацияларга министиэристибэтиттэн иһитиннэрэллэр.
Арассыыйаҕа Педагог уонна уһуйааччы, Саха сиригэр Үлэ сылларынан ыытыллар «Муус устар» тэрээһин 12 хайысханан барар: «Спорт», «Кинематография уонна мультипликация», «Digital уонна IT», «Киберспорт», «Журналистика уонна блогинг», «Танцевальный квартал» уонна «Музыка Якутии», «Старт к успеху», «Молодой бизнес», «Молодой педагог», «Добровольчество», «Дипломатия», «ESG».
«Ааспыт сылларга элбэх ыччат хабыллыбыта: 200 тыһ.кэриҥэ киһи кыттыыны ылбыта бэлиэтэнэр. Бу бэстибээли Саха сирэ эрэ буолбакка, бүтүн Арассыыйа үрдүнэн сэҥээрэллэрин, сэргииллэрин көрдөрөр. Биһиги ыччаппыт айар дьоҕурдаах, талааннаах. Биһиги ону сайыннаралларыгар усулуобуйа тэрийэргэ кыһаллабыт. Ол иһин, сыл ахсын кинилэр тугу этэллэрин, ыйыталларын истэбит, тугу сэргииллэрин, тугу баҕаралларын билэргэ дьулуһабыт. Быйыл бары тиэмэлэр дойдуга бэриниилээх буолууга сыһыаннаахтар», — диэн СӨ Ыччат дьыалаларыгар министиэристибэтэ иһитиннэрэр.
Түмүк кулун тутар 24 күнүгэр «Триумф» успуорт комплексыгар ыытыллар. Этиллибитин курдук, араас тиэмэлэринэн 12 былаһаакка тэриллиэ, быһа көрдөрөргө видеоустуудьуйа үлэлиэ, сүрүн сцена, арт-эбийиэктэр болҕомтону тардыахтара. Маны таһынан, Сайсары күөлгэ далааһыннаах тэрээһин былааннанар.
Бэстибээл бырагырааматын https://vk.com/wall-211413150_321 көрүөххэ сөп.