«МУУС УСТАР» бэстибээлгэ “Лента времени” куонкурус кыайыылаахтарын быһаардылар

Бүгүн, кулун тутар 18 күнүгэр, Саха сирин национальнай тэлэбидиэнньэтигэр быһа эпииргэ “Лента времени»  куонкурус кыайыылаахтарын быһаардылар.

Аҕа дойду Улуу сэриитигэр Кыайыы 80 уонна Арассыыйаҕа  Аҕа дойдуну көмүскээччи, Саха сиригэр Ийэ дойдуну көмүскээччи сылларыгар анаммыт куонкурус бу сыл олунньу 1 күнүттэн саҕаламмыта.

Бастакы түһүмэххэ – онлайн-тестированиеҕа Саха сириттэн, Владивосток уонна Москва куораттартан 1041 киһи бэйэтин билиитин тургутта. Ньурба уонна Ленскэй улууһуттан кыттааччылар ордук көхтөөхтөр. Иккис түһүмэххэ 30 муниципальнай тэриллииттэн 107 кыттааччы ааста. Бу түһүмэх түмүгүнэн финалга 15 киһи тахсан,  өрөспүүбүлүкэ тэлэбидиэнньэтигэр ток-шоуга кытынна.

«Саха” НКиХ үрдүк тэрээһиннэрин иһин махтаныахпытын баҕарабыт. Ыытааччы Ларина Сукуева,  Тина Канделаки курдук, үрдүк таһымнаахтык  ыытта. Кыттааччылар олус долгуйдулар, ол да буоллар,  Аҕа дойду Улуу сэриитин уонна Саха сирин  устуоруйатын билэллэрин көрдөрдүлэр”, — диэн СӨ эдэр учууталлар ассоциацияларыттан тэрийээччи Николай Захаров иһитиннэрдэ.

«Лента времени» куонкурус кыайыылаахтара

14-17 саастаахтарга:

Равгана Халинбекова (Томпо улууһа)

Наиля Васильева (Өлөөн улууһа)

Аэлита Старостина (Чурапчы улууһа)

Алина Канашова (Томпо улууһа)

Эвелина Олчонова (Уус Маайа улууһа).

Кыайыылаах Аэлита Старостина:

“Миэхэ саамай уустугунан эссени суруйуу этэ. Бүгүн ток-шоуга олус долгуйдум, кыайарбар эрэммэтэҕим эрээри, түмүккэ кыайыылаах таҕыстым.  Чурапчым улууһугар, төрөппүттэрбэр уонна биир дойдулаахтарбар өйөбүллэрин иһин махтанабын”.

18-24 саастаахтарга:

Эрхан Никулин (Дьокуускай к.)

Сергей Николаев (Бүлүү улууһа)

Сардана Кириллина (Нам улууһа)

Айыллаана Катанова (Чурапчы улууһа)

Нарыйа Васильева (Үөһээ Бүлүү улууһа)

Кыайыылаах Сергей Николаев:

«Ыйытыылар ыарахан этилэр. Долгуйбутум, ол эрэн эмискэ кыайдым. Тэрийээччилэргэ улахан махтал. Ток-шоу — мин бастакы уопутум, урут хаһан да уһуллубатаҕым”.

25-35 саастаахтарга:

Олеся Семенова (Усуйаана улууһа)

Нюргуяна Андросова (Ньурба улууһа)

Ирина Лунева (Уус Маайа улууһа)

Виктория Хозеева (Хаҥалас улууһа)

Саргылана Трофимова (Чурапчы улууһа).

Кыайыылаах Виктория Хозеева:

«Миэхэ олус соһуччу буолла. Үһүс түһүмэх балачча уустук этэ, ол гынан баран,  ситиһиилэнним”.

Кыайыылаахтар 20 000 солкуобай кээмэйдээх бирииһи ыллылар.

«МУУС УСТАР» бэстибээл Саха сиригэр 2021 сылтан бэһис төгүлүн ыытыллар. Тэрээһин сыала-соруга — өрөспүүбүлүкэҕэ араас эйгэҕэ талааннаах эдэр дьону булуу, өйөөһүн уонна сырдатыы. Бэстибээли генеральнай спонсор “Эльга” хампаанньа өйөбүлүнэн Саха Өрөспүүбүлүкэтин бырабыыталыстыбата тэрийэр.