«Муус Устар» бэстибээли түмүктүүр дьоро киэһэҕэ Ил Дархан кыттыыны ылла

Бүгүн «Өрөгөй» спортивнай комплекска буолбут «Муус Устар» бэстибээл түмүктүүр үбүлүөйдээх тэрээһинигэр Ил Дархан Айсен Николаев кыттыыны ылла.

— «Муус устар» ыччат бэстибээлэ  эрэ буолбакка, инники кэскилбит күүстээх эньиэргийэтинэн уонна үөрэтэр-иитэр  былаһаакканан буолар. Тэрээһиҥҥэ 12 хайысха  уонна 23 күөн-күрэс түмүлүннэ. Олортон уона — сонун сүүрээн. Үгүс хайысха Улуу Кыайыы 80 сылыгар, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылыгар ананна.  Бэстибээли түмүктүүр былаһааккалары бэркэ кэрэхсээтим — хас биирдиилэрэ киһини угуйар дириҥ ис хоһооннох эйгэ.

«Муус Устар» бэстибээл сыл аайы таһыма үрдээн, кыттар ыччаттара билиилэринэн-көрүүлэринэн айар-тутар  баҕалара эрчимирэн иһэр. Эрэлбит — ыччаппытыгар, — диэн бэйэтин телеграм-ханаалыгар Ил Дархан Айсен Николаев бэлиэтээтэ.