«Муус Устар»: Егор Ноенохов бириис харчытынан киинэ уһулбут

«Муус Устар-2023» бэстибээлгэ саҥа саҕалаан эрэр сценаристар кылгас киинэни уһулуу куонкуруһугар кыттар кыахтаммыттара. Бу айымньылаах күрэһи Таатта улууһуттан Егор Ноенохов кыайбыта.

«Мин бэстибээлгэ «Создавай и воплощай» треккэ «Осознанные сны» диэн кылгас киинэ сценарийы суруйан кыттыбытым. Бу сценарийы үлэм быыһыгар суруйар этим. Кыайыым кыахпын улаатыннарбыта уонна атын дьонтон үлэбин сыаналыырбын көҥүллээбитэ», — диэн Егор санаатын үллэһиннэ.

Сценарийынан эдэр киһи эскапизм тиэмэтин чинчийэр уонна түүл кырдьык-албын икки ардыларын үөрэтэрин туһунан кэпсэнэр. Айымньы сүрүн идиэйэтэ эдэр дьон өйүгэр-санаатыгар олус элбэхтик дьиҥнээх олохтон аккаастанан, сымыйа олоҕунан итэҕэйэн олороллорун арыйар.

«Бириистээх харчыбын киинэ уһуларбар туттубутум. Билигин киинэ каадырдара бары уһулуннулар, монтаж кэнниттэн хас да куонкуруска кыттар былааннаахпын. «Муус Устарга» бу кыах баар буолбутунан махтанабын!» — диэн Егор Неонохов ис сүрэҕиттэн махтанна.

Күн бүгүн эдэр уол «Пространство» устуудьуйаҕа сценарист уонна монтажер быһыытынан үлэлиир. Итини таһынан киинэҕэ үлэтинэн уонна видеопродакшенынан үлүһүйэр. Кини 2024 сыллаахха прокат лидерэ — «Карина» диэн киинэ уһулуутугар кыттыбытын бэлиэтиэххэ наада.