«МУУС УСТАР» эспиэрэ Валентин Макаров «Мин аатым Таптал» киинэтэ ситиһиилээхтик саҕаланна

Саха режиссера, “МУУС УСТАР” өрөспүүбүлүкэтээҕи ыччат бэстибээлин эспиэрэ Валентин Макаров олунньу 13 күнүгэр саҕаламмыт “Мин аатым Таптал” киинэтэ бастакы нэдиэлэтигэр 10 мөл. солк. киллэрдэ.

Киинэ сүрүн санаата — ким көрдүүр ол буларын уонна бэриммэккэ дьолго дьулуһуохха наадатын санатар.

«Мин аатым Таптал» романтическай кэмиэдьийэни устууга 515 киһи кытынна. Актриса Татьяна Легантьева көрдөөх-нардаах, чэпчэки тыыннаах майгыта сүрүн дьоруой Таптал уобараһын айыыга төрүөт буолбут. Киинэҕэ М.С. Щепкин аатынан Үрдүкү Москватааҕы театральнай училище саха студиятын актердара кытыннылар.

Валентин Макаров «МУУС УСТАР» бэстибээл «Коротко о важном!» кылгас метражтаах киинэлэр куонкурустарын эспиэринэн буолар.

Куонкурус сыала-соруга – эдэр ааптардар айар кыахтарын сайыннарыы уонна социальнай суолталаах ааптарскай бырайыактары айалларыгар көҕүлээһин. Бу хамсааһын эдэр ыччат айар дьулуурун өйүүргэ туһуланар уонна бастыҥ айымньылары өрөспүүбүлүкэ үрдүнэн көрөөччүгэ тарҕатар кыаҕы биэрэр.

«Коротко о важном!» социальнай видеокуонкуруска 18-тан 35-гэр диэри саастаах ыччат, профессионаллар уонна бэйэтэ таптыырынан устар дьон, биирдиилээн ааптардар уонна айар хамаандалар кыттыахтарын сөп.

Куонкуруска киирэр социальнай видеороликтар тиэмэлэрэ: билиҥҥи кэм патриотизма, уопсастыба аныгы тирээн турар кыһалҕалара уонна сиэрдээх сыаннастара диэн суруйар Ил Дархан уонна бырабыыталыстыба пресс-сулууспата.