«Муус Устар»: Фиджитал-футболга «Арктика Куубагын»  ханнык хамаанда ылла?

«Муус Устар» ыччат бэстибээлин чэрчитинэн,  фиджитал-футболга «Арктика Куубага»   ыытылынна. Бүгүн «Дохсун» успуорт комплексыгар финалга бастыҥ хамаандалар  кииристилэр. 

Турнирга Саха сирин муниципальнай тэриллиилэрин уонна куораттааҕы уокуруктарын хомуур хамаандалара, 14-тэн 35-гэр диэри саастаах ыччаттар кытыннылар.  Күрэхтэһии икки күн устата  буолла.

СӨ успуорт миниистирэ Леонид Спиридонов бэҕэһээ, кулун тутар 17 күнүгэр, күрэхтэһии аһыллыытыгар:

— Күн бүгүн фиджитал-успуорт Арассыыйаҕа күүскэ сайдан иһэр. Онон, успуорт бу көрүҥэ биһиги өрөспүүбүлүкэбитигэр сайдарыгар баҕарабыт,-  диэн этэн турар.

Бүгүн тыҥааһыннаах киирсии түмүгэр, бастакы миэстэҕэ Дьокуускай куорат хамаандата тахсан, «Спортмастер» маҕаһыынтан  140 тыһ. солк. суумалаах сэртипикээтинэн наҕараадаланна.  Иккиһи — усуйааналар («Спортмастер»  маҕаһыынтан  105 тыһ. солк. сэртипикээт), үсүһү  — чурапчылар ыллылар («Спортмастер» маҕаһыынтан  70 тыһ. солк. сэртипикээт).

Кыайыылаах хамаанда хапытаана Константин Разин күрэхтэһии үрдүк таһымҥа ыытыллыбытын бэлиэтээн эттэ.