«МУУС УСТАР»: «Күүспүт сомоҕолоһууга» диэн байыаннай-патриотическай күрэхтэһии саҕаланна

Бүгүн, кулун тутар 18 күнүгэр, Дьокуускай куорат «Дохсун» успуорт уораҕайыгар «МУУС УСТАР» бэстибээл иһинэн «Күүспүт сомоҕолоһууга» диэн байыаннай-патриотическай иитиигэ туһаайар күрэхтэһии саҕаланна. Тэрээһин үөрүүлээх аһыллыытын «Воин» эрэгийиэннэээҕи салаатын дириэктэрэ Василий Егоров: «Төрөөбүт дойдугутун таптааҥ, көмүскээҥ» диэн күүстээх тылларынан арыйда.

Бүгүн байыанай-патриотическай хайысхаҕа күрэхтэһэ уопсайа 21 улуустан алталыы киһилээх хамаандалар  хомуллан кэлбиттэр. Бу туһунан «Воин» киин иитэр үлэҕэ салаатын салайааччыта Александра Васильевна Потапова сырдатта:

-Биһиэхэ 21 улуустан уопсайа 126 кыттааччы кэллэ. Ол курдук, манна 18-35 cаастарыгар диэри саастаах ыччат кытта кэллэ. Тэрээһиммит аһыллыытын кэнниттэн хас даҕаны былаһаакканан маастар-кылаастар буолуохтара. Онно кыттааччыларбыт салгыы хайдах күрэхтэһэллэригэр бэлэмнэнэллэр. Сарсыҥҥыттан «Дьоруойдары кытта кэпсэтии» диэн тэрээһин буолуоҕа. Манна Арассыыйа икки дьоруойун, ол курдук Саха сириттэн бастакы дьоруой аатын сүкпүт Александр Колесовы уонна Николай Евдокимовы кытта көрсүһүү буолуоҕа. Дьэ, ити кэннэ хамаандаларбыт иккилии буолан оруолларынан арахсыахтара. Бу алта киһилээх хамаандаттан иккитэ миэдик, иккитэ БПЛА пилота, иккитэ (стрелок) ытааччы. Бу үс хайысханан сарсын күрэхтэһиилэрбит саҕаланыахтара. Ол курдук, үс атын-атын былаһааккаларынан арахсан күрэхтэһиэхтэрэ. Ытааччылар «Факел» успуорт комплекска, миэдиктэр Автодорожнай тиэхиньикумҥа, пилоттар Дуткин аатынан технология кэллиэһигэр күрэхтэһиэхтэрэ. Үс көрүҥ түмүгүнэн уон чулуу хамаанда байыаннай хайысхалаах эстафетаҕа күрэхтэһиэхтэрэ. Ол түмүгүнэн бастакы үс хамаанда түмүгэ тахсар. Бирииспит олус үчүгэй, кыайыылаах хамаанда харчынан бириэмийэлэниэ.

Кыттааччылар санаалара

Дархан Афанасьев, Дьокуускай куорат хамаандатын чилиэнэ:

— Биһиги Дьокуускай куорат чиэһин көмүскүү кэллибит. Хамаандабытыгар ХИФУ устудьуоннара  баарбыт. Ол курдук араас үөрэх кыһаларыттан хомуллан кэллибит. Мин историческай факультет 4-c кууруһун устудьуона буолабын. Биһиги бары университеппыт уонна куораппыт чиэһин көмүскүү кэллибит. Мин Юра диэн доҕорбун кытта ытааччы (стрелок) күрэҕэр кыттабыт. Сорох уолаттарбыт тактическай мэдиссиинэ уонна БПЛА пилотун күрэҕэр кыттыахтара.

Мария Цыренова, Өймөкөөн улууһун хамаандатын чилиэнэ:

— Мин Өймөкөөн улууһун Уус Ньара бөһүөлэгиттэн кытта кэллим. Эбии үөрэхтээһин педагогунан үлэлиибин. «МУУС УСТАР» бэстибээлгэ номнуо иккиспин кыттабын. Бүгүн байыаннай-патриотическай бэлэмнэнии трегар кыттабыт. Биһиги хамаандабытыгар байыаннай дьайыы кыттыылааҕа  баар уоннааҕылар бары үлэһиттэрбит.  Тэрээһини олус астынныбыт. Хамаанда бөҕөтө кытта кэлбит. Бары бэлэмнээхтэр аҕай быһыылаах. маастар-кылаастарга сылдьыахпыт, эбии билиибитин чиҥэтиэхпит, бэлэмнэниэхпит. Маннык тэрээһиннэр ыччаты түмэллэр дии саныыбын. Биһиги кыайыыга эрэллээхпит!

Александр Рожненко, Өймөкөөн улууһун хамаандатын чилиэнэ, байыаннай дьайыы кыттыылааҕа:

— Мин байыаннай дьайыы кыттыылааҕа буолабын, суһал байыаннай ыҥырыынан дойдубун көмүскүү сулууспалыы барбытым. Мин бэстибээлгэ бастакыбын кыттабын. Тактическай миэдик хайысхатыгар боруобаланан көрүөм. Байыаннай дьайыыттан соторутааҕыта бааһыраммын кэлбитим.

Гаврил Портнягин, Уус Алдан улууһун хамаандатын чилиэнэ:

— Мин Уус Алдан улууһун хамаандатын чилиэнэ буолабын. Бэйэм ХИФУ юридическай кэллиэһин бастакы кууруһун устудьуонабын. Бэстибээлгэ бастакыбын кыттабын, оттон байыаннай хайысхалаах тэрээһиннэргэ оскуола сааспыттан кыттааччыбын. Хамаандабытыгар эрдэ кыттыбыт дьон баар. Мин кыайыыга эрэллээхпин дии саныыбын.