Оҕо ускуустубатын оскуолата саҥа тэрилинэн хааччылынна

Уус Алдан улууһугар Бороҕоҥҥо оҕо ускуустубатын оскуолата «Дьиэ кэргэн» национальнай бырайыак көмөтүнэн саҥа тэрилинэн хааччылынна.

Национальнай бырайыак иитинэн атыылаһыллыбыт саҥа тэриллэри дьоҥҥо-сэргэҕэ, оҕолорго көрдөрөр үөрүлээх күн буолан ааста. Оскуоланы хааччыйарга федеральнай, өрөспүүбүлүкэ уонна олохтоох бүддьүөттэн 3 мөл.тахса солк. субсидия көрүллүбүт. Бу туһунан СӨ култууратын уонна духуобунай сайдыытын министиэристибэтэ иһитиннэрэр.

Ол курдук, оскуола муусукаҕа отделениета «Соната» саҥа пианиноламмыт, «Юпитер» диэн икки баяннаммыт, балалайкалары, домралары, уо.д.а. үстүрүмүөннэргэ наадалаах тэриллэри ылбыттар. Ону тэҥэ, оҕолору үөрэтэргэ скрипканан, учуобунньуктарынан, гитараларынан, флейталарынан, саксофоннарынан, уо.д.а. хааччыллыбыттар. Уруһуйга үөрэтэргэ мольбертар, мобильнай компьютернай кылаас, графическай планшеттар, быыстапкалыыр истиэндэ, үҥкүү кылааһыгар станок, сиэркилэ, уо.д.а. баар буолбуттар.

Ылыллыбыт муусука үстүрүмүөннэрэ, тэриллэр, үөрэтэр матырыйааллар барыта кэмигэр аҕалыллыбыттарын туһунан СӨ култууратын уонна духуобунай сайдыытын министиэристибэтэ иһитиннэрэр.

Хаартыска СӨ култууратын уона духуобунай сайдыытын министиэристибэтин саайтыттан ылылынна