Муусука уонна фольклор түмэлигэр «Лирик» позывнойдаах байыас быыстапката аһылынна

Бүгүн, Аҕа дойду Дьоруойдарын күнүгэр, Муусука уонна фольклор түмэлигэр байыаннай дьайыы кыттыылаахтарын, былаас уорганнарын, култуура, үөрэҕирии  бэрэстэбиитэллэрин уонна ыччаттары сомоҕолуур үөрүүлээх тэрээһин буолла. 

Ол курдук бэйиэт, фотохудуоһунньук, Ленскэй волонтера,  «Лирик» позывнойдаах Сергей Шестаков быыстапката аһылынна.

Тэрээһин Сергей Шестаков  2024 сыллаахха ДНР-га Макеевка куоракка сылдьан суруйбут «Счастье не за горами» хоһоонунан саҕаланна.

Сергей Шестаков  быыстапкаҕа Ленскэй куораттан видеосибээһинэн кытынна. Кини байыаннай дьайыы сиригэр сулууспатын туһунан ахтан-санаан ааста.

Кэлбит ыалдьыттарга эҕэрдэ тылын култуура миниистирэ Афанасий Ноев эттэ уонна  байыаннай дьайыы кыттыылаахтарыгар өйөбүл, устуоруйа дьоһун суолталаахтарын бэлиэтээтэ.

Фотобыыстапка  2025 сыл ахсынньы  24 күнүгэр диэри Дьокуускай куоракка Киров уул., 31 (3 этээс) үлэлиэҕэ.