Муусука үрдүкү оскуолатын саҥа куорпуһун тутууга бу сылга былааннаммыт үлэ барыта туолла

Муусука үрдүкү оскуолатын саҥа куорпуһун тутууга бу сылга былааннаммыт үлэ барыта туолбутун туһунан Судаарыстыбаннай сакаасчыт сулууспатын генеральнай дириэктэрэ Гаврил Скрыбыкин иһитиннэрдэ.

Билиҥҥи туругунан бу сылга былааннаммыт 122 сыбаайа барыта турбут.

РФ Бэрэсидьиэнэ Владимир Путин сорудаҕынан, 2025 сылга музыкальнай инструменнар ылыллалларыгар уонна 2026 сылга муусука үрдүкү оскуолатын (ВШМ) саҥа куорпуһа тутуллан үлэҕэ киириэр диэри  Арассыыйа Бырабыыталыстыбата федеральнай бүддьүөттэн сыл аайы үп көрүллэрин хааччыйыахтаах.

Үс этээстээх комплекс 9,5 тыһ. кв.м. иэннээх, манна 240 оҕо үөрэнэр куорпуһа уонна 150 миэстэлээх интэринээт киирэллэр. Маны таһынан улахан кэнсиэртиир саала, бибилэтиэкэ, ырыаны устар устуудьуйа, фонотека кэбиниэтэ, успуорт саалата баар буолуохтара.