Муусука үрдүкү оскуолатын тутуута көхтөөхтүк барар

Дьокуускайга В.А.Босиков аатынан Муусука үрдүкү оскуолатын иккис уочаратын тутуута ыытыллар. Эбийиэги тутуу кыраапык быһыытынан барар, 2026 сыл бүтүүтэ үлэҕэ киириэхтээх.

Бырайыагы олоххо киллэриигэ анаан федеральнай хааһынаттан 1,5 млрд. солк. тахса үп көрүллүбүтэ. 10 тыһ. кв.м. кэриҥэ иэннээх үөрэх аныгы дьиэтэ 240 миэстэлээх үөрэнэр куорпустаах уонна 150 миэстэлээх интэринээттээх.

“Өссө бастакы ректор Василий Афанасьевич Босиков анал дьиэ тутуутун туһунан Бырабыыталыстыбаҕа сурук суруйбута. Билигин Муусука үрдүкү оскуолатыгар баар аҕыс тус-туспа кэлэктиип эрэпэтииссийэҕэ биир сааланы туһанарбыт олус ыарахан. Саҥа дьиэҕэ кэнсиэртиир улахан саала, хас биирдии кэлэктиип бэлэмнэнэригэр чопчу акустикалаах туспа хостордоох буолуоҕа. Кэлэктиип барыта олус долгуйан туран, бу муусука ускуустубата, классическай инструменнарга оонньуур мусукааннары бэлэмнээһин  салгыы сайдарыгар кыаҕы биэриэ диэн олус кэтэһэр. Бу — манна үлэлээбиттэр барыларын баҕа санаата. Бу – Саха сирин оҕолоро симфоническай орекстарга оонньуохтара, кинилэри СӨ Муусука оскуолата бэлэмниэҕэ диэн 1992 сыллаахха быһаарыы ылыммыт Бастакы бэрэсидьиэммит Михаил Ефимович Николаев баҕа санаата этэ”, – диэн Муусука үрдүкү оскуолатын ректора Надежда Зайкова санаатын үллэстэр.

Былырыын дойду Бэрэсидьиэнин кытта көрсүһүүгэ Муусука үрдүкү оскуолатын үөрэнээччилэрэ “Симфония добра” мусукалынай толорууга бэстибээл-куонкуруһу ыытар идиэйэни киллэрбиттэрэ. Владимир Путин ити көҕүлээһини өйөөбүтэ, бэстибээл-куонкуруһу ыытыы Бэрэсидьиэн өрөспүүбүлүкэҕэ кэлэн барыытын түмүгэр тахсыбыт сорудахтар испииһэктэригэр киирбитэ.

“Биһиги саҥа дьиэлэнэрбититтэн, саҥа тэриллэнэрбититтэн эрдэттэн үөрэбит. Ити туһунан биһиги Бэрэсидьиэнтэн бэйэтиттэн истибиппит. Владимир Путин: “Муусука үрдүкү оскуолата баар буолуоҕа!” – диэн эппитэ.  Кини туһунан үтүө өйдөбүллээх хаалбыппыт, кэнсиэрпитин биһирээбитэ. Билигин буолар “Симфония добра” бырайыакпытын өйөөбүтүттэн үөрэбит. Мин тустаах күөн күрэскэ “Скрипка” хайысхатыгар кыттабын. Бу суолталаах тэрээһиҥҥэ сылы быһа бэлэмнэнним, күрэстэһээччилэрим күүстээхтэр.  Эрдэ эрэгийиэннээҕи, Бүтүн Арассыыйатааҕы, норуоттар икки ардыларынааҕы күөн күрэстэргэ кыттыбытым. “Розовая чайка” күөн күрэскэ икки төгүл бастакы бириэмийэ лауреата буолбутум”, – диэн Муусука үрдүкү оскуолатын 10-с кылааһын үөрэнээччитэ, “Саҥа ааттар” пуонда стипендиата, норуоттар икки ардыларынааҕы уонна Бүтүн Арассыыйатааҕы күөн күрэстэр лауреата Айсулуу Туркебаева кэпсиир.

Бэс ыйын 24-30 күннэригэр Дьокуускайга “Симфония добра” норуоттар икки ардыларынааҕы I бэстибээл-куонкурус ыытылла турар. Монголияттан, Кытайтан, Казахстантан, Узбекистантан уонна Уһук Илин 9 эрэгийиэниттэн 6 хайысха 18 номинациятынан 250-тан тахса мусукаан, камернай ансаамбыл кыттар.

Бу туһунан Ил Дархан уонна Бырабыыталыстыба пресс-сулууспата суруйар.