Муусуканы улаханнык холбоон…

Дьокуускайга 4 №-дээх полиция отделын дьуһуурунай чааһыгар эр киһи подъезка киниэхэ ыала саба түспүтүн туһунан үҥсүбүт.

Холуобунай ирдэбил үлэһиттэрэ суһал үлэ ыыппыттарын түмүгэр, бу Ньурба улууһуттан төрүттээх 48 саастаах киһи буолара быһаарыллыбыт.

Ол курдук, уорбаланааччы дьиэтигэр сылдьан аттынааҕы кыбартыыраҕа муусуканы улаханнык холбообуттарын истибит. Кини муусуканы кыччаттараары тиийэн тоҥсуйбут да, ааны аспатахтар. Онуоха бу киһи кыбартыыра уотун араарбыт уонна ыала тахсарын кэтэспит. Муусукалаах киһи уота тоҕо барбытын билээри кыбартыыратыттан тахсыбытыгар иирсибиттэр, ол түмүгэр уорбаланааччы бу киһини хаста да сирэйгэ охсубут. Сирэйгэ охсуллубут киһи дьиэтигэр киирбит уонна полицияны ыҥырбыт. Эмсэҕэлээччи мунна, сыҥаҕа тостубут диэн быһаарыллыбыт.

РФ Холуобунай кодексатын 112 ыст. 1 ч. холуобунай дьыала («Умышленное причинение средней тяжести вреда здоровью») тэриллибит.

СӨ ИДьМ пресс-сулууспата